തൃശൂർ: ജില്ലാ ശുചിത്വമിഷന്റെ നേതൃത്വത്തിലുള്ള സ്വച്ഛതാ ഹി സേവാ കാമ്പയിന്റെ ഭാഗമായി ജില്ലയിൽ ഒക്ടോബർ രണ്ടിന് സ്‌കൂളുകളിൽ ശുചീകരണം നടത്താൻ കളക്ടർ എസ്. ഷാനവാസിന്റെ അദ്ധ്യക്ഷതയിൽ ചേർന്ന യോഗം തീരുമാനിച്ചു. സ്‌കൂളുകളിൽ പ്ലാസ്റ്റിക് മാലിന്യ വിരുദ്ധ പ്രതിജ്ഞ ചൊല്ലും. ജില്ലാതല ഉദ്ഘാടനം തൃശൂർ മോഡൽ ഗേൾസ് ഹയർ സെക്കൻഡറി സ്‌കൂളിൽ നടത്തും. പുനരുപയോഗിക്കാവുന്ന പ്ലാസ്റ്റിക് മാലിന്യം പ്രാദേശിക തലത്തിൽ ശേഖരിക്കും. പ്ലാസ്റ്റിക് ക്യാരിബാഗുകൾക്കെതിരായ കാമ്പയിന്റെ ഭാഗമായി സ്‌കൂൾ വിദ്യാർത്ഥികൾക്ക് തുണിസഞ്ചികൾ വിതരണം ചെയ്യാൻ കളക്ടർ നിർദേശിച്ചു.
ശുചിത്വമിഷന്റെ കളക്ടേഴ്‌സ് അറ്റ് സ്‌കൂൾ പദ്ധതിയുടെ ഭാഗമായി സ്‌കൂളുകളിൽ നിന്ന് മാലിന്യം തരംതിരിച്ച് സംസ്‌കരിക്കുന്നതിനായി ചവറ്റുകൊട്ടകൾ സ്ഥാപിക്കുന്നതിന് തദ്ദേശ സ്വയംഭരണ സ്ഥാപനങ്ങൾ പദ്ധതി തയാറാക്കി സെപ്തംബർ 27ഓടെ സമർപ്പിക്കാൻ കളക്ടർ നിർദേശം നൽകി. കടലാസ്, പാൽ കവറുകൾ, കനം കുറഞ്ഞ പ്ലാസ്റ്റിക് കുപ്പികൾ, കട്ടിയുള്ള പ്ലാസ്റ്റിക് കുപ്പികൾ എന്നിങ്ങനെ നാല് തരത്തിലാണ് പ്ലാസ്റ്റിക് മാലിന്യം പുനരുപയോഗത്തിനായി ശേഖരിക്കുക. ഇവ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിൽ ശേഖരിച്ച് സ്‌ക്രാപ് ഡീലർമാർ മുഖേന കയറ്റി അയക്കും. ജില്ലയിൽ പൈലറ്റ് പ്രോജക്ടായി മൂന്ന് സ്‌കൂളുകളിലാണ് പദ്ധതി നടപ്പിലാക്കുക. ഇതിന് ശേഷമാണ് മറ്റ് സ്‌കൂളുകളിലേക്ക് പദ്ധതി വ്യാപിപ്പിക്കുക.