തൊടിയൂർ: റെയിൽവേ പാലത്തിലൂടെ നടക്കവേ ട്രെയിൻ വരുന്നതുകണ്ട് രക്ഷപ്പെടാൻ ട്രോളിപാത്തിൽ കയറിനിന്നയാൾ ആറ്റിൽവീണു മരിച്ചു. തൊടിയൂർ കല്ലേലിഭാഗം കാട്ടൂർ തെക്കതിൽ ഗോപിയാണ് (53) മരിച്ചത് . ഇന്നലെ വൈകിട്ട് നാലിനായിരുന്നു സംഭവം. പാലത്തിനടുത്ത് താമസിക്കുന്ന മൈനാഗപ്പള്ളി കൈതവിള തെക്കതിൽ ഷാന്റെ വീട്ടിലെ ചടങ്ങിൽ പങ്കെടുത്തശേഷം പള്ളിക്കലാറിലെ കല്ലുകടവ് പാലത്തിലൂടെ നടക്കുമ്പോഴാണ് ട്രെയിൻ വന്നത്. പാലത്തിന്റെ വശത്തെ ട്രോളിപാത്തിൽ കയറി കൈവരിയോട് ചേർന്നു നിന്നപ്പോൾ കൈവരി ഇളകി ഗോപി ആറ്റിൽ പതിക്കുകയായിരുന്നു.ഷാന്റെ വീട്ടിലെത്തിയ കൊല്ലം സ്വദേശി ആഷ്ക്കർ (21) ഗോപിയെ രക്ഷിക്കാൻ ആറ്റിലേക്ക് ചാടിയെങ്കിലും ശ്രമം പരാജയപ്പെട്ടു. ഷാനും ചാടി തെരച്ചിൽ നടത്തി. കൊല്ലം ഫയർഫോഴ്സിന്റെ സ്കൂബാ ടീം നടത്തിയ തെരച്ചിലിലാണ് ആറുമണിയോടെ മൃതദേഹം കണ്ടെത്തിയത്. ഗോപി മരപ്പണിക്കാരനാണ്. ഭാര്യ രമ. മക്കൾ: കൃഷ്ണകുമാർ, ഗോപകുമാർ, ഗോപിക. മരുമകൾ അശ്വതി.