മാറനല്ലൂർ: മേലാരിയോട് വിശുദ്ധ മദർതെരേസ ദേവാലയത്തിലെ തീർഥാടന തിരുനാളിന് ഭക്തി നിർഭരമായ തുടക്കം. പാതാക പ്രയാണം കടമ്പനാംകോണം ജംഗ്ഷനിൽ ഇടവക സഹവികാരി ഫാ. അലക്സ് സൈമൺ ആശീർവദിച്ചു. തുടർന്ന് പതാക പ്രയാണം നടന്നു. ഇടവക വികാരി ഫാ.ജോണി കെ. ലോറൻസ് കൊടിയേറ്റ് തീർഥാടന തിരുനാളിന് തുടക്കം കുറിച്ചു. തീർഥാടന പ്രാരംഭ ദിവ്യബലിക്ക് നെയ്യാറ്റിൻകര രൂപത വികാരി ജനറൽ മോൺ. ജി. ക്രിസ്തുദാസ് മുഖ്യ കാർമ്മികത്വം വഹിച്ചു. ഉച്ചക്കട ഇടവക വികാരി ഫാ.സി. ജോയി വചന സന്ദേശം നൽകി. നെയ്യാറ്റിൻകര രൂപതയിലെ മുതിർന്ന വൈദികൻ ഫാ. ഫ്രാൻസിസ് സേവ്യർ, ഇടവക വികാരി ഫാ.ജോണി കെലോറൻസ്, സഹവികാരി ഫാ.അലക്സ് സൈമൺ തുടങ്ങിയവർ സഹ. കാർമ്മികരായി. 8ന് വൈകിട്ട് 6.30 ന് നടക്കുന്ന സമൂഹ ദിവ്യബലിയോടെയാണ് തീർഥാടനത്തിന് സമാപനമാവുന്നത്.