കിളിമാനൂർ:ബൈക്കുകൾ കൂട്ടിയിടിച്ച് യുവാവ് മരിച്ചു. പള്ളിക്കൽ മൂതലകുളങ്ങര ഹൗസിൽ അബ്ദുൾ കലാം, ആബിദാ ബീവി ദമ്പതിമാരുടെ മകൻ സിദ്ധിഖ് (26) ആണ് മരിച്ചത്. തിങ്കളാഴ്ച രാത്രി എട്ടുമണിയോടെ പള്ളിക്കൽ മൂതലയിൽ ആയിരുന്നു അപകടം. അബുദാബി അൽ ​ഗസൽ കമ്പനിയിൽ ജോലിയുണ്ടായിരുന്ന സിദ്ദിഖ് അവധിക്ക് നാട്ടിലെത്തിയതായിരുന്നു. ചൊവ്വാഴ്ച അബുദാബിയിലേക്ക് മടങ്ങാനിരിക്കുകയായിരുന്നു. സുഹൃത്തുക്കളിൽ ചിലരെ കണ്ട് യാത്രപറയാനായി തിങ്കളാഴ്ച രാത്രി വീട്ടിൽ നിന്ന് ബൈക്കുമായി ഇറങ്ങിയതായിരുന്നു . എന്നാൽ സിദ്ധിഖ് സഞ്ചരിച്ചതിന് എതിർ ദിശയിൽ അമിതവേ​ഗതയിൽ നിയന്ത്രണം വിട്ട് പാഞ്ഞെത്തിയ ബൈക്ക് സിദ്ധിഖിനെ ഇടിച്ചിടുകയായിരുന്നു. ​ഗുരുതരപരിക്കേറ്റ സിദ്ദിഖ് ഏറെ നേരം ചോരവാർന്ന് റോഡിൽ കിടന്നു. ഒടുവിൽ സിദ്ദിഖിന്റെ സുഹൃത്തുക്കൾ എത്തി ആശുപത്രിയിലാക്കാൻ ശ്രമിച്ചെങ്കിലും മരിച്ചു. സിദ്ധിഖിനെ ഇടിച്ചിട്ട ബൈക്കിലുണ്ടായിരുന്ന യുവാക്കൾക്കും പരിക്കേറ്റു. ഇവർ മദ്യലഹരിയിലായിരുന്നുവെന്ന് നാട്ടുകാർ പറയുന്നു. സീനത്ത്, റാഹത്ത് എന്നിവർ സഹോദരിമാരാണ് .