തിരുവനന്തപുരം: സംസ്ഥാന സർക്കാരിന്റെ ഓണാഘോഷത്തിന് അവിസ്മരണീയ ക്ലൈമാക്സ് ഒരുക്കാൻ കൗമുദി ടി.വി 'ഓണം എക്സ്ട്രീം' 16ന് സെൻട്രൽ സ്റ്റേഡിയത്തിൽ കൊട്ടിക്കയറും. ഓണം വാരാഘോഷത്തിന്റെ ഘോഷയാത്ര അവസാനിച്ച ശേഷം മന്ത്രി ജി. സുധാകരൻ 'ഓണം എക്സ്ട്രീമിന്റെ' ഉദ്ഘാടനം നിർവഹിക്കും. 'തട്ടത്തിൻ മറയത്ത്' എന്ന സിനിമയിലെ 'മുത്തുച്ചിപ്പി പോലൊരു...' എന്ന ഗാനമാലപിച്ച് മലയാള മനസുകളിൽ ചേക്കേറിയ യുവഗായകൻ സച്ചിൻവാര്യരും മെലഡികളിലൂടെ പ്രിയങ്കരിയായ മൃദുല വാര്യരും നേതൃത്വം നൽകുന്ന ഗായകർക്കൊപ്പം സംസ്ഥാനത്തെ ഏറ്റവും മികച്ച ചെണ്ടമേള ഗ്രൂപ്പുകളിലൊന്നായ ആട്ടം മേളക്കാരും പ്രമുഖ മ്യൂസിക് ബാൻഡ് 'ചെമ്മീനും' ഒത്തു ചേരുമ്പോൾ അതൊരു ഗംഭീര മേളക്കാഴ്ചയായി മാറും. സംഗീതാഘോഷത്തിനൊപ്പം ജിംനാസ്റ്റിക് പ്രകടനത്തിലൂടെ ഗിന്നസ് ബുക്കിൽ ഇടം നേടിയ കോയമ്പത്തൂർ സ്വദേശി വൈഷ്ണവി,​ നിരവധി റിയാലിറ്റി ഷോകളിലൂടെ പ്രശസ്തയായ ഗൗരി എന്നിവരുടെ പ്രകടനവും കാണികൾക്ക് ആസ്വദിക്കാൻ കഴിയും. മന്ത്രി കടകംപള്ളി സുരേന്ദ്രൻ,​ മേയർ വി.കെ. പ്രശാന്ത് തുടങ്ങിയവർ അതിഥികളായി എത്തും.