തിരുവനന്തപുരം: സൗത്ത് ഇന്ത്യൻ സിനിമ ടെലിവിഷൻ അക്കാഡമി ആൻഡ് ഫിലിം സൊസൈറ്റിയുടെ സിനിമ- ടെലിവിഷൻ അവാർഡുകൾ പ്രസ്ക്ലബിൽ നടന്ന ചടങ്ങിൽ പ്രസിഡന്റ് ജി.എസ്. പ്രദീപ് പ്രഖ്യാപിച്ചു. 20,​000രൂപയും പ്രശസ്തി പത്രവും ഫലകവുമടങ്ങുന്ന രത്ന പുരസ്കാരങ്ങൾക്ക് സംവിധായകൻ ഷാജി എൻ കരുൺ,​ ബാലാവകാശ കമ്മിഷൻ ചെയർമാൻ പി. സുരേഷ്,​ കവി മുരുകൻ കാട്ടാക്കട,​ വത്സൻ മഠത്തിൽ (വിദ്യാഭ്യാസം), ഷാഹുൽ ഹമീദ് (മനുഷ്യാവകാശം), നർഗീസ് ബീഗം (ജീവകാരുണ്യം), സി.എച്ച്. ഇബ്രാഹിംകുട്ടി (വിദ്യാഭ്യാസം), ജയനാരായണൻ (സാമൂഹ്യസേവനം) എന്നിവർ അർഹരായി. ഉയരെ ആണ് മികച്ച ചിത്രം. മികച്ച സംവിധായകൻ: ശ്യാമപ്രസാദ് (ചിത്രം: ഒരുഞായറാഴ്ച). മികച്ച നടൻ: ഇന്ദ്രൻസ് (വെയിൽമരങ്ങൾ), മികച്ച നടി: ചിന്നു ചാന്ദിനി (തമാശ). അയ്യങ്കാളി ഹാളിൽ 28ന് ആരംഭിക്കുന്ന സൗത്ത് ഇന്ത്യൻ ഷോർട്ട്ഫിലിം ഫെസ്റ്റിന്റെ സമാപന ദിവസമായ 30ന് വൈകിട്ട് 5ന് മന്ത്രിമാരായ കെ.കെ ശൈലജ, കടകംപള്ളി സുരേന്ദ്രൻ എന്നിവർ പുരസ്കാരങ്ങൾ വിതരണം ചെയ്യും.