തിരുവനന്തപുരം: എൽ.എൽ.ബി (ത്രിവത്സര - ഈവനിംഗ്) പരീക്ഷകൾ തോന്നിയ മട്ടിൽ നടത്തിയ കേരള സർ

വകലാശാലക്കെതിരെ സംസ്ഥാന മനുഷ്യാവകാശ കമ്മിഷൻ കേസെടുത്തു. പരീക്ഷാ കൺട്രോളർ മൂന്ന് ദിവസത്തിനകം റിപ്പോർട്ട് നൽകണമെന്ന് കമ്മിഷൻ അദ്ധ്യക്ഷൻ ജസ്​റ്റിസ് ആന്റണി ഡൊമിനിക് ഉത്തരവിട്ടു. 2017 സെപ്​തംബറിൽ ക്ലാസുകൾ ആരംഭിച്ചശേഷം 16 മാസത്തോളം ഒരു സെമസ്​റ്റർ പരീക്ഷ പോലും നടത്താതിരുന്ന സർവകലാശാല ആഴ്ചകളുടെ വ്യത്യാസത്തിൽ പരീക്ഷകൾ ഒന്നിച്ച് നടത്തുകയായിരുന്നു.

2018 ഡിസംബറിൽ ആദ്യ സെമസ്​റ്റർ പരീക്ഷ തുടങ്ങി. കഴിഞ്ഞ ജനുവരിയിൽ പൂർത്തിയാക്കി. കഴിഞ്ഞ ജൂണിൽ ആരംഭിച്ച രണ്ടാം സെമസ്​റ്റർ പരീക്ഷ ജൂലായിലാണ് പൂർത്തിയായത്. ഇതിനു പിന്നാലെ ഒന്നാം സെമസ്​റ്ററിന്റെ സപ്ലിമെന്ററി പരീക്ഷ ആരംഭിച്ചു. ജൂലായ് 5ന് രണ്ടാം സെമസ്​റ്റർ പരീക്ഷ അവസാനിച്ച് ഒരു മാസത്തിനുള്ളിൽ മൂന്നാം സെമസ്​റ്റർ പരീക്ഷയുടെ വിജ്ഞാപനമിറക്കി. എന്നാൽ പ്രളയം കാരണം ആഗസ്​റ്റ് 25 നാണ് പരീക്ഷ തുടങ്ങിയത്. മൂന്നാം സെമസ്​റ്റർ പൂർത്തിയാകും മുമ്പ് നാലാം സെമസ്​റ്ററിന്റെ വിജ്ഞാപനമിറക്കി.

6 മാസത്തെ ഇടവേളകളിലായി 24 മാസങ്ങൾ കൊണ്ട് 4 സെമസ്​റ്റർ പരീക്ഷ നടത്തേണ്ട സർവകലാശാല വെറും 10 മാസങ്ങൾ കൊണ്ട് 4 സെമസ്​റ്റർ പരീക്ഷകളാണ് നടത്തിയത്. വിദ്യാർത്ഥികൾക്ക്‌ കോഴ്‌സിന്റെ ഭാഗമായ സെമിനാറുകളും ടെസ്​റ്റ്‌പേപ്പറുകളും പൂർത്തിയാക്കാനായില്ല. എൽ എൽ ബി പരീക്ഷകൾ കൃത്യമായി നടത്തണമെന്ന ഹൈക്കോടതി ഉത്തരവ് സർവകലാശാല നടപ്പാക്കുന്നില്ലെന്ന് ലാ അക്കാഡമി വിദ്യാർത്ഥി ഉല്ലാസ് കൃഷ്ണന്റെ നേതൃത്വത്തിൽ വിദ്യാർത്ഥികൾ നൽകിയ പരാതിയിൽ പറയുന്നു.