ആലപ്പുഴ: ഇവിടെയൊരു കണ്ണടയ്‌ക്ക് വില പറയുകയാണ് - ഒന്നരക്കോടി രൂപ. ഓഫർ വിദേശികളുടേതാണ്. പക്ഷേ എത്ര കോടികൾ മുന്നിൽ വച്ചാലും കണ്ണട തരില്ലെന്ന് പറഞ്ഞ് ജോസഫ് കെ. പാലത്ര ആ നിധി നെഞ്ചോട് ചേർത്തു. കോടികൾക്ക് മുകളിൽ മൂല്യമുള്ള ആ കണ്ണടയുടെ ഉടമ സാക്ഷാൽ ഗാന്ധിജിയും. മുല്ലയ്‌ക്കൽ തെരുവിലെ വെള്ളിയാഭരണ കച്ചവടക്കാരൻ ജോസഫി​ന്റെ കൈയിലെ ബാപ്പുജിയുടെ കണ്ണടയ്‌ക്ക് പറയാനുള്ളത് 92 വർഷത്തെ കഥയാണ്.

കണ്ണടക്കഥ ഇങ്ങനെ

1927ൽ കേരള സന്ദർശനത്തി​നി​ടെ ആലപ്പുഴയി​ലെത്തിയ ഗാന്ധി​ജി​ വി​ശ്രമി​ച്ചത് കൊപ്രാ വ്യവസായി​യായ നവറോജി സേട്ടിന്റെ വീട്ടിൽ. അവിടെ വച്ച് ഗാന്ധിജിയുടെ കണ്ണട കൈയിൽ നിന്ന് വീണ് പൊട്ടി. തുടർന്ന് സേട്ട് മറ്റൊരു കണ്ണട നൽകി. പൊട്ടിയ വെള്ളി ഫ്രെയിമുള്ള വട്ടക്കണ്ണട സേട്ട് കൈയി​ൽ സൂക്ഷി​ച്ചു. ഗാന്ധിജി മടങ്ങി. കാലം കടന്നുപോയി. കൊപ്രാ വ്യവസായം മോശമായപ്പോൾ 1982ൽ സേട്ട് കുടുംബം വീട് വിറ്റ് സ്വദേശമായ മുംബയിലേക്ക് പോയി. അന്ന് സുഹൃത്തുക്കൾ ഒരുക്കിയ യാത്ര അയപ്പ് സംഗമത്തിൽ സേട്ടി​ന്റെ കൊച്ചുമകൻ നാരി​യൽ വാലാ സേട്ടാണ് ജോസഫിന് സ്നേഹസമ്മാനമായി ഗാന്ധിക്കണ്ണട നൽകിയത്. അന്ന് കോൺ​ഗ്രസിന്റെ ആലപ്പുഴ മണ്ഡലം പ്രസി​ഡന്റായി​രുന്നു ജോസഫ്.

മുൻ ജി​ല്ലാകളക്ടർ പി. വേണുഗോപാലിന്റെ നിർദ്ദേശത്തെത്തുടർന്ന് ബാങ്ക് ലോക്കറിലാണ് കണ്ണട ഇപ്പോഴുള്ളത്. പുരാവസ്‌തു വകുപ്പ് ഏറ്റെടുക്കാൻ ശ്രമിച്ചെങ്കിലും വിട്ട് കൊടുത്തില്ല. തന്റെ കാലശേഷം മക്കൾക്ക് സംരക്ഷിക്കാൻ കഴിയുമെങ്കിൽ നൽകും. അല്ലെങ്കിൽ വിശ്വാസമുള്ളവർക്ക് നൽകുമെന്നാണ് ജോസഫ് പറയുന്നത്. എന്നാലിന്ന് രാഷ്ട്രീയത്തോടൊന്നും ജോസഫിന് വലി​യ താത്പര്യമില്ല. മറി​യാമ്മയാണ് ഭാര്യ. മക്കൾ : മേരി​ ജോ, ആൻ ജോ.

ഞാൻ കാവൽക്കാരൻ, വി​ൽക്കി​ല്ല

37 വർഷം മുമ്പ് തന്റെ കൈയിലെത്തിയ ഗാന്ധിയുടെ കണ്ണട ഒരു കാവൽക്കാരനെന്ന പോലെയാണ് ജോസഫ് സൂക്ഷി​ക്കുന്നത്. വിദേശത്തുള്ള മക്കളും ജോസഫിന്റെ ചില കൂട്ടുകാരുമാണ് കണ്ണടയെക്കുറിച്ചുള്ള വിവരങ്ങൾ നൽകിയത്. കണ്ണടയ്‌ക്കായി കഴി​ഞ്ഞ ദി​വസം ഒന്നര കോടി​ രൂപയാണ് വി​ദേശത്ത് നി​ന്ന് ഫോണി​ൽ ബന്ധപ്പെട്ടയാൾ വി​ല പറഞ്ഞത്. ഇതോടെ ഗാന്ധിജിയുടെ 150-ാം ജന്മവാർഷികത്തിൽ ജോസഫ് പാലത്ര ആലപ്പുഴയിൽ സ്റ്റാറായി.