ആലപ്പുഴ: കമ്മ്യൂണിസ്റ്റ് ഉരുക്കുകോട്ടയിൽ നീണ്ട ആറ് പതിറ്രാണ്ടിന് ശേഷം കോൺഗ്രസ് പതാക പാറിച്ച് ഷാനിമോൾ ഉസ്മാൻ .എൽ.ഡി.എഫ് അടക്കി വാണിരുന്ന അരൂരിൽ സി.പി.എമ്മിലെ മനു സി.പുളിക്കലിന് മേൽ യു.ഡി.എഫ് സ്ഥാനാർത്ഥി ഷാനിമോൾ ഉസ്മാന്റെ വിജയം . 2079 വോട്ടുകൾക്കാണ്.

തങ്ങളുടെ കുത്തകയായിരുന്ന വട്ടിയൂർക്കാവും കോന്നിയും എൽ.ഡി.എഫ് വൻ മാർജിനിൽ പിടിക്കുന്നത് കണ്ട് ഞെട്ടിത്തരിച്ച കോൺഗ്രസിനും യു.ഡി.എഫിനും സി.പി.എമ്മിൻെറ തറവാട്ടിലെ വിജയം നൽകിയ ആശ്വാസം ചെറുതല്ല..ചെങ്കോട്ട പൊളിക്കാൻ കഴിഞ്ഞതിൽ . വിജയാവരം മുഴക്കി യു.ഡി.എഫുകാർ തുള്ളിച്ചാടി. 58വർഷങ്ങൾക്കുശേഷമാണ് കോൺഗ്രസിൻെറ കൊടി അരൂരിൽ പാറുന്നത്.

അരൂർ മണ്ഡലത്തിലെ പത്ത് പഞ്ചായത്തുകളിലും ലീഡ് നേടിക്കൊണ്ടാണ് ഷാനിമോൾ എൽ.ഡി.എഫ് കേന്ദ്രങ്ങളെ ഞെട്ടിച്ചത്. പോസ്റ്റൽ വോട്ട് എണ്ണിയപ്പോൾ മനുവിനായിരുന്നു ലീഡ്. പിന്നീട് കണ്ടത് ഷാനിയുടെ കുതിപ്പായിരുന്നു. അത് പിന്നെ പിന്നോ ട്ടായില്ല. വോട്ടെണ്ണലിൻെറ ഒരവസരത്തിൽപോലും മനുവിന് മുന്നേറാനായില്ല. മറ്റ് നാല് മണ്ഡലങ്ങളിലെ വോട്ടെണ്ണൽ തീർന്നിട്ടും സസ്പെൻസ് നിലനിറുത്തി വോട്ടെണ്ണൽ മുന്നേറിയപ്പോൾ ലീഡ് നില മാറിമറിയുമാേ എന്നായി ആശങ്ക. എൽ.ഡി.എഫ് ക്യാമ്പുകൾ മ്ളാനതയിലായപ്പോൾ യു.ഡി.എഫ് ഉത്സാഹത്തിൻെറ തേരോടിക്കാൻ കാത്തിരിക്കുകയായിരുന്നു. വോട്ടെണ്ണൽ ക്ളൈമാക്സിലെത്തിയപ്പോൾ ലീഡ് നില ചെറുതായൊന്ന് താഴ്ന്നത് എൽ.ഡി.എഫിന് പ്രതീക്ഷ നൽകിയെങ്കിലും ലീഡ് വീണ്ടും മുന്നേറി വിജയം ഷാനിയിലേക്ക് എത്തുക യായിരുന്നു. 2016ലെ നിയമസഭാ തിരഞ്ഞെടുപ്പിൽ 36,519 വോട്ടുകളുടെ ഭൂരിപക്ഷത്തിലാണ് സി.പി.എമ്മിലെ എ.എം.ആരിഫ് വിജയിച്ചത്. 2019ലെ പാർലമെൻറ് തിരഞ്ഞെടുപ്പിൽ ആലപ്പുഴയിൽ ആരിഫിനെതിരെ മത്സരിച്ച ഷാനിമോൾ അരൂർ നിയമസഭാ സീറ്റിൽ 648 വോട്ടിൻെറ ഭൂരിപക്ഷം നേടിയിരുന്നു.

ഫലം ഇങ്ങനെ

ഷാനിമോൾ ഉസ്മാൻ (യു.ഡി.എഫ്): 69356

മനു സി.പുളിക്കൽ (എൽ.ഡി.എഫ്): 67277

പ്രകാശ്ബാബു(എൻ.ഡി.എ) : 16289

ഗീതാ അശോകൻ (കോൺ.റെബൽ) : 352

കെ.വി.സുനിൽകുമാർ(സ്വതന്ത്രൻ ) :278

ആലപ്പി സുഗുണൻ(സ്വതന്ത്രൻ) :142

നോട്ട:840

അസാധു:25

ഭൂരിപക്ഷം: 2079