കായംകുളം: ദേശീയപാതയിൽ അപടത്തിൽപ്പെട്ട കാറിൽനിന്നിറങ്ങിയ യുവാവ് യാത്രക്കാർക്ക് നേരെ തോക്ക് ചൂണ്ടിയ സംഭവത്തിൽ പതിനൊന്ന് പേർക്കെതിരെ കായംകുളം പൊലീസ് കേസെടുത്തു. ഇവർ ഒളിവിലാണ്.

ചൊവ്വാഴ്ച രാത്രി 11 ഓടെ ദേശീയപാതയിൽ കെ.എസ്.ആർ.ടി.സി ബസ് സ്റ്റാൻഡിന് സമീപത്തായി​രുന്നു സംഭവം.

പൊലീസ് പറയുന്നത്:

ദേശീയപാതയിലെ ഡിവൈഡറുകൾ അവസാനിക്കുന്ന ഭാഗത്ത് രണ്ട് സ്ത്രീകൾ സഞ്ചരിച്ചിരുന്ന കാറിന് പിന്നിൽ, നാല് യുവാക്കൾ സഞ്ചരിച്ചിരുന്ന വെള്ള ഐ ട്വന്റി

കാർ തട്ടി. തുടർന്ന് ഇരുകാറുകളും റോഡിൽ നിറുത്തിയിട്ടു. ഇതു മൂലം ഗതാഗതതടസമുണ്ടായി. ഇതിനിടെ കാറുകൾക്കു പിന്നിൽ വന്ന ലോറിയുടെ ഡ്രൈവർ ഹോൺ മുഴക്കി. ഇതിൽ പ്രകോപിതനായാണ് ഐ ട്വന്റി കാറിൽ നിന്ന് യുവാവ് പുറത്തിറങ്ങി തോക്കു ചൂണ്ടിയത്.

ബഹളത്തിനിടെ ഓടിക്കൂടിയ നാട്ടുകാർക്ക് നേരെയും യുവാവ് ആക്രോശിച്ചുകൊണ്ട് തോക്കുചൂണ്ടി.

നാട്ടുകാർ പൊലീസിനെ വിവരം അറിയിച്ചപ്പോഴേക്കും എട്ട് ബൈക്കുകളിലെത്തിയ സംഘത്തോടൊപ്പം യുവാവ് കാറിൽ കയറി രക്ഷപ്പെടുകയായി​രുന്നു. കാറിനുള്ളിൽ മൂന്ന് പേർ കൂടി ഉണ്ടായിരുന്നതായി ദൃക്സാക്ഷികൾ പറഞ്ഞു.

സി.സി ടിവി കാമറയിൽ പതിഞ്ഞ കാറിന്റെ നമ്പർ വച്ച് അന്വേഷണം നടത്തിയെങ്കിലും ഈ വാഹന നമ്പർ വ്യാജമാണെന്ന് പൊലീസ് തിരിച്ചറിഞ്ഞു. ബൈക്കുകളുടെ അകമ്പടിയോടെ വ്യാജ നമ്പർപ്ളേറ്റുള്ള കാറിൽ തോക്കുമായി സഞ്ചരിച്ച സംഘത്തി​ന് കവർച്ച തുടങ്ങി​യ ലക്ഷ്യങ്ങളുണ്ടാകുമെന്നും ഇവർക്ക് ക്രിമിനൽ പശ്ചാത്തലമുണ്ടെന്നുമാണ് പൊലീസി​ന്റെ നി​ഗമനം.