ആലപ്പുഴ : വാറ്റ് നിയമത്തിന്റെ മറവിൽ വ്യാപാരികളെ പീഡിപ്പിച്ച് ആത്മഹത്യയിലേക്ക് തള്ളിവിടുന്ന സർക്കാർ നടപടിയിൽ പ്രതിഷേധിച്ച് വ്യാപാരി വ്യവസായി ഏകോപന സമിതി 29 ന് സംസ്ഥാന വ്യാപകമായി കടകളടച്ച് പണിമുടക്കും. സെക്രട്ടേറിയറ്റിലേക്കും ജില്ലാ കളക്ടറ്റുകളിലേക്കും പ്രതിഷേധ മാർച്ചും ധർണയും നടത്തും.
മാവേലിക്കര താലൂക്കിലെ ചെറുകിട വ്യാപാരിയായ ജീവൻ ആത്മഹത്യയ്ക്ക് ശ്രമിച്ച് ആലപ്പുഴ മെഡിക്കൽ കോളേജിൽ ചികിത്സയിലാണ്. ഖജനാവിലേക്ക് വരുമാനമുണ്ടാക്കാൻ സർക്കാർ നടത്തുന്ന ഹീനമായ നടപടിയിൽ നിന്ന് പിന്മാറിയില്ലങ്കിൽ അനിശ്ചിതകാലത്തേക്ക് സ്ഥാപനങ്ങൾ അടച്ചിട്ട് വ്യാപാരികൾ ഒന്നടങ്കം തെരുവിലിറങ്ങുമെന്ന് സമിതി സംസ്ഥാന പ്രസിഡന്റ് ടി.നസിറുദ്ദീനും ജനറൽ സെക്രട്ടറി രാജു അപ്സരയും പറഞ്ഞു.