കൊച്ചി: എറണാകുളം ഉപതിരഞ്ഞെടുപ്പിൽ പ്രചരണാവശ്യത്തിനുപയോഗിക്കുന്ന വിവിധ വസ്തുക്കളുടെ നിരക്ക് തിരഞ്ഞെടുപ്പ് കമ്മിഷൻ പ്രസിദ്ധീകരിച്ചു. ഒരു കസേരക്ക് ആറു രൂപയാണ് പ്രതിദിനവാടക . ഊണിന് 80 രൂപയും സ്റ്റിക്കർ പതിച്ച ഒരു കുടയ്‌ക്ക് 150 രൂപയും ചെലവ് കണക്കാക്കും. കൈയില്ലാത്ത കസേരക്കാണ് ആറു രൂപ. കൈയുള്ള കസേരക്ക് എട്ടു രൂപയാണ് ഒരു ദിവസത്തെ വാടക. വി.ഐ.പി കസേരയാണെങ്കിൽ 50 രൂപ നൽകണം. മേശയ്ക്ക് 25 രൂപയും സോഫയ്ക്ക് 250 രൂപയുമാണ് നിരക്ക്. ഒരു ബാഡ്ജിന് മൂന്നു രൂപ.
ആംപ്ലിഫൈയറോടു കൂടിയ സ്പീക്കറിന് 1500 രൂപയും സ്റ്റാന്റോടു കൂടിയ മൈക്രോഫോണിന് 250 രൂപയും എക്കോ മിക്സറിന് 650 രൂപയും സി.ഡി.പ്ലേയറിന് 200 രൂപയുമാണ് നിരക്ക്. എൽ.സി.ഡി പ്രൊജക്ടർ 1500 രൂപ, എൽ.ഇ.ഡി ടി.വി (40-56 ഇഞ്ച്) 1500 രൂപ, വാട്ടർ കൂളറിന് 1500 രൂപ വീതമാണ് നിരക്ക്. 1000 പോസ്റ്ററുകൾക്ക് 4500 രൂപ കണക്കാക്കും. 500 സീറ്റുകളുള്ള ഹാളിന് 10,000 രൂപയും അഞ്ഞൂറിൽ താഴെ സീറ്റുള്ളവയ്ക്ക് 6,000 രൂപയുമാണ് വാടക.10 പേരുള്ള ചെണ്ടമേളത്തിന് 7,000, 20 പേരുള്ള ചെണ്ടമേളത്തിന് 12,000, ശിങ്കാരിമേളത്തിന് 10,000, പഞ്ചവാദ്യത്തിന് 5,000, നാദസ്വരത്തിന് 4,000, എട്ടു പേരുള്ള കാവടിയാട്ടത്തിന് 10,000രൂപ എന്നിങ്ങനെയാണ് നിരക്ക്. ഡ്രൈവർക്ക് പ്രതിദിനം 700 രൂപ .
അലങ്കരിച്ച ജീപ്പിന് 3000 രൂപയാണ് നിരക്ക്. ഗാനമേളയോ നാടൻ പാട്ടോ സംഘടിപ്പിക്കാൻ 10,000 രൂപ വേണം. ഒരു മൊബൈൽ എസ് എം എസിന് 25 പൈസ കണക്കാക്കും. വാഹന പ്രചരണത്തിന് പ്രതിദിനം ഒരാൾക്ക് 1,000 രൂപ നിരക്കിൽ കണക്കാക്കും.