# സംഘാടകർ കേരളകൗമുദിയും എസ്.എൻ.ഡി.പി യോഗം മൂവാറ്റുപുഴ യൂണിയനും

മൂവാറ്റുപുഴ: കേരളകൗമുദിയും എസ്.എൻ.ഡി.പി യോഗം മൂവാറ്റുപുഴ യൂണിയനും ചേർന്നൊരുക്കുന്ന വിദ്യാരംഭ ചടങ്ങിന് ശ്രീകുമാരഭജന ദേവസ്വം ക്ഷേത്രത്തിൽ ഒരുക്കം പൂർത്തിയായി. വിദ്യാരംഭത്തോടനുബന്ധിച്ചുള്ള നവരാത്രി മഹോത്സവം നടന്നുവരുന്നു. വിദ്യാരംഭദിനമായ 8ന് രാവിലെ 9ന് വിദ്യാരംഭം ചടങ്ങുകൾ ആരംഭിക്കും. ക്ഷേത്രം മേൽശാന്തി ബിജുശാന്തി മുഖ്യകാർമ്മികത്വം വഹിക്കും.

കേരള സാഹിത്യഅക്കാഡമി മുൻ സെക്രട്ടറിയും എഴുത്തുകാരനുമായ പായിപ്ര രാധാകൃഷ്ണൻ, പി.എസ്.സി മെമ്പർ ഡോ. കെ.പി. സജിലാൽ എന്നീ ആചാര്യന്മാർ തേനിൽമുക്കിയ സ്വർണം കൊണ്ട് കുഞ്ഞുങ്ങളുടെ നാവിൽ ആദ്യക്ഷരം കുറിക്കും. വിദ്യാരംഭത്തിന് എത്തുന്ന കുട്ടികൾക്ക് വിശിഷ്ട കദളിഫല നിവേദ്യപ്രസാദം നൽകും. മുതിർന്നവർക്ക് എഴുതാനും സംഗീതോപാസന നടത്തുവാനും ചിത്രരചനയ്ക്കും സൗകര്യമൊരുക്കിയിട്ടുണ്ട്. വിദ്യാരംഭത്തിന് മുന്നോടിയായി ദേവീസന്നിധിയിൽ വിശേഷാൽപൂജ നടന്നുവരുന്നു. ഇന്ന് പൂജവയ്പും പതിവ് പൂജകളും.നാളെ ശ്രീചക്ര പൂജ, 7ന് മഹാനവമി , 8ന് വിജയദശമി, പൂജയെടുപ്പ്, വിദ്യാരംഭം. ചടങ്ങുകൾക്ക് യൂണിയൻ പ്രസിഡന്റ് വി.കെ . നാരായണൻ, സെക്രട്ടറി അഡ്വ.എ.കെ. അനിൽകുമാർ, വൈസ് പ്രസിഡന്റ് പി.എൻ. പ്രഭ, ക്ഷേത്രകമ്മിറ്റി കൺവീനർ പി.വി. അശോകൻ, ബോർഡ് മെമ്പർ പ്രമോദ് കെ. തമ്പാൻ, അഡ്വ. എൻ. രമേശ് എന്നിവർ നേതൃത്വം നൽകും.