ചൊറിച്ചിൽ എന്നർത്ഥം വരുന്ന ‘സോറ’ എന്ന ഗ്രീക്ക് പദത്തിൽ നിന്നാണ് ‘സോറിയാസിസ്’ എന്ന പേര് വന്നത്. പേര് സൂചിപ്പിക്കുന്ന പോലെ അമിതമായ ചൊറിച്ചിൽ,​ ചുവന്ന കട്ടിയായ ചർമ്മം,​ ഉണങ്ങിയ വെളുത്ത ചെതുമ്പൽ പോലുള്ള ചർമ്മം കൊഴിഞ്ഞു പോകുക എന്നിവയാണ് രോഗത്തിന്റെ പ്രധാന ലക്ഷണങ്ങൾ. ചുവന്ന ചെറിയ കുരുവായി ആദ്യം ദേഹത്ത് പ്രത്യക്ഷപ്പെടുന്ന ഇത് കാലക്രമേണ വലുതായി മേൽപറഞ്ഞ അവസ്ഥയിൽ എത്തുന്നു. ആയുർവേദത്തിൽ ഇതിനെ സിദ്ധ്മ കുഷ്ഠത്തോട് ഉപമിക്കുന്നു.

മാനസിക പിരിമുറുക്കം,​ പ്രോട്ടീൻ കൂടുതലടങ്ങിയ ആഹാരങ്ങൾ,​ പാലുല്പന്നങ്ങൾ,​ ചില കിഴങ്ങ് വർഗങ്ങൾ,​ മദ്യപാനം,​ പുകവലി,​ രക്തദൂഷ്യം തുടങ്ങിയ കാരണങ്ങളാൽ വാതം,​ കഫം എന്നീ ദോഷങ്ങൾ വർദ്ധിച്ച് രക്തധാതുവിനെ ദുഷിപ്പിക്കുന്നു. ഇത് കാലക്രമേണ ചർമ്മ കോശങ്ങളെ ബാധിക്കുകയും അവ ക്രമാതീതമായ ചർമ്മ വളർച്ചയ്ക്ക് കാരണമാകുകയും ചെയ്യുന്നു. സോറിയാസിസിന്റെ പ്രധാനകാരണം രക്തദുഷ്ടിയാണ്. ഇത്തരം രോഗികൾക്ക് ഉള്ളിൽ നൽകുന്ന എണ്ണ,​ ശോധനക്രിയകൾ എന്നിവയിലൂടെ രക്തശുദ്ധി വരുത്തിയ ശേഷം അരഗ്വധാദി കഷായം,​ തിക്തം, കഷായം,​ പടോലമൂലാഭി കഷായം എന്നീ കഷായങ്ങൾ അവസ്ഥാനുസരണം സേവിക്കണം. അതോടാെപ്പം ത്വക്കിലേക്കുള്ള രക്തപ്രവാഹം വർദ്ധിപ്പിക്കാനും ത്വക്കിന്റെ മാർദ്ദവം കൂട്ടാനും അഭ്യംഗം മുതലായ ക്രിയാക്രമങ്ങൾ ഉപകരിക്കും.

തക്രധാര,​ തൈലധാര എന്നിവ മാനസിക പിരിമുറുക്കം കുറയ്ക്കാൻ ഉപകരിക്കും. ഇതോടൊപ്പം ശാസ്​ത്രീയ ആഹാരവിഹാരങ്ങൾ,​ കാലാവസ്ഥാ മാറ്റത്തിനനുസരിച്ചുള്ള ദിനചര്യകൾ പാലിക്കുന്നതിനൊപ്പം ആയുർവേദ വിധി പ്രകാരമുള്ള ചിട്ടകൾ പാലിക്കുന്നതും രോഗശമനത്തിന് ഫലപ്രദമായി മാറും.

ഡോ. അഭിലാഷ്. ആർ,

മെഡിക്കൽ ഓഫീസർ,

നാഗാർജുന ആയുർവേദ കേന്ദ്രം,

കാലടി.

ഫോൺ: 9961883334