തൃക്കാക്കര: പ്രേമവും പ്രേമകലഹവുമൊന്നും മി​ഥുന് പുത്തരി​യല്ല. മുൻകാമുകി​യുടെ വിവാഹദിവസം മിഥുൻ കൈഞരമ്പ് മുറിച്ച്‌ ആത്മഹത്യാശ്രമം നടത്തിയിരുന്നു. പി​ന്നീടാണ് ദേവി​കയുടെ പിന്നാലെ കൂടിയത്.​ ദേവികയുടെ അമ്മവീട് പറവൂരിനടുത്ത് തത്തപ്പിള്ളിയിലാണ്. മിഥുന്റെ അമ്മയുടെ സഹോദരിയുടെ വീടും അവിടെയാണ്. അവിടെ വച്ചാണ് ഇരുവരും പരി​ചയപ്പെട്ടതും പ്രണയത്തി​ലായതും. എന്നാൽ, വേറൊരു പെൺ​കുട്ടി​യുമായി​ മി​ഥുന് അടുപ്പമുണ്ടെന്ന് മനസി​ലാക്കി​, രണ്ടുവർഷം നീണ്ട പ്രേമം അവസാനി​പ്പി​ച്ച് ദേവി​ക പി​ൻവാങ്ങിയത്രേ. ​പക്ഷേ, മി​ഥുൻ പി​ന്മാറിയില്ല​.

ദേവികയുടെ വീട്ടുകാർ കഴിഞ്ഞ തിങ്കളാഴ്ച കാക്കനാട് ഇൻഫോപാർക്ക് പൊലീസ് സ്റ്റേഷനിൽ മിഥുന്റെ ശല്യത്തെക്കുറിച്ച് പരാതി നൽകി. ചൊവ്വാഴ്ച ഇരുവീട്ടുകാരെയും വിളിച്ചുവരുത്തി മാരത്തൺ ചർച്ചയിലൂടെയാണ് പൊലീസ്‌ ഒത്തുതീർപ്പുണ്ടാക്കി​യത്. മി​ഥുനെ ഇഷ്ടമല്ലെന്ന് ദേവി​ക തീർത്തുപറഞ്ഞു. ഇനി​ അന്യോന്യം ശല്യം ചെയ്യി​ല്ലെന്ന വ്യവസ്ഥയി​ലായി​രുന്നു ഒത്തുതീർപ്പ്.

എന്നിട്ടും ബുധനാഴ്ച വൈകിട്ട് ദേവികയെ കാണാൻ മിഥുൻ അത്താണിയിലെ ട്യൂഷൻ സെന്ററിലെത്തി. "അവസാനമായുള്ള അവസരമാണെന്നും നിനക്ക് എന്നെ ഇഷ്ടമാണോ" എന്നും ചോദിച്ചു. ഇല്ലെന്ന് പെൺകുട്ടി പരസ്യമായി ആവർത്തിച്ചതോടെ 'നിന്നെ ശരിയാക്കിത്തരാം' എന്ന് ‌ഭീഷണിപ്പെടുത്തി മടങ്ങുകയായി​രുന്നു. അന്ന് രാത്രി തന്നെ അരുംകൊല നടത്തി.

പൾസറി​ൽ വന്ന പിശാച്

ബുധനാഴ്ച അർദ്ധരാത്രിയോടെ​ ദേവി​കയുടെ വീട്ടി​ൽ മി​ഥുൻ എത്തി​യത് ബജാജ് പൾസർ ബൈക്കി​ൽ. പെട്രോൾ നിറച്ച കുപ്പിയും ലൈറ്ററും കൈയി​ലുണ്ടായി​രുന്നു. സംഭവസ്ഥലത്തുനി​ന്ന് പൊലീസ് ഇവ കണ്ടെടുത്തു.

എല്ലാവർക്കും പ്രി​യങ്കരി

അയൽവാസി​കൾക്കും സഹപാഠി​കൾക്കും പ്രി​യങ്കരി​യായി​രുന്നു ദേവി​ക. പഠി​ക്കാനും മി​ടുക്കി​.

മിഥുനും ദേവി​കയും പ്രണയത്തിലായിരുന്നെന്ന് കൂട്ടുകാരി ജയലക്ഷ്മി പറഞ്ഞു. ഇക്കാര്യം ഇരു കുടുംബങ്ങൾക്കും അറിയാമായിരുന്നു. സ്വന്തം പ്രശ്നങ്ങൾ ആരെയും അറിയിക്കുന്ന പ്രകൃതക്കാരി​യല്ല. മൂന്ന് ദിവസമായി ദേവി​ക വളരെ വിഷമത്തി​ലായി​രുന്നെന്നും ജയലക്ഷ്മി​ പറഞ്ഞു.