കൊച്ചി: ജീവൻ രക്ഷാ പ്രവർത്തനങ്ങളുടെ പ്രധാന്യം വിദ്യാർത്ഥികളിൽ എത്തിക്കുന്നതിനും വിലപ്പെട്ട ജീവൻ രക്ഷിക്കാൻ പ്രാപ്തരാക്കുന്നതിനും ബ്രഹദ് പദ്ധതിയുമായി എറണാകുളം മെഡിക്കൽ ട്രസ്റ്റ് ആശുപത്രി പദ്ധതി നടപ്പാക്കും. റീ സ്റ്റാർട്ട് എ ഹാർട്ട് എന്ന ആരോഗ്യ പരിപാലന പദ്ധതി ഇന്ന് ആരംഭിക്കും. സ്കൂളുകളിലെ വിദ്യാർത്ഥികൾക്കാണ് പരിശീലനം നൽകുന്നത്. ഹൃദയം നിശ്ചലമാകുന്ന സമയത്ത് അടിയന്തര ശുശ്രൂഷ നൽകുന്നതുൾപ്പെടെ പരിശീലനമാണ് നടപ്പാക്കുന്നത്.

ഹൃദയാഘാതത്തിനു പുറമെ അപകടം പോലെ മറ്റ് അത്യാഹിതങ്ങളിലും അകപ്പെടുന്നവരുടെ ജീവൻ രക്ഷിക്കാനുള്ള പരിശീലനവും നൽകും. ഒന്നാംഘട്ടത്തിൽ ടോക് എച്ച്, എറണാകുളം സൗത്ത് ഗവ. ഗേൾസ് ഹയർ സെക്കൻഡറി, കലൂർ മോഡൽ ടെക്നിക്കൽ ഹയർ സെക്കൻഡറി, എസ്.ആർ.വി. വൊക്കേഷണൽ ഹയർ സെക്കൻഡറി, സെന്റ് ആൽബർട്സ് ഹയർ സെക്കൻഡറി, തേവര സേക്രഡ് ഹാർട്ട് പബ്ളിക് സ്കൂൾ, സെന്റ് തെരേസാസ് കോൺവെന്റ് ഗേൾസ് ഹയർ സെക്കൻഡറി, തൃപ്പൂണിത്തുറ ചോയ്സ് എന്നീ സ്കൂളുകളിലെ വിദ്യർത്ഥികൾക്കാണ് പരിശീലനം നൽകുക.

സിനിമാതാരം സാജു നവോദയ പദ്ധതി ഉദ്ഘാടനം ചെയ്യും. ഉച്ചയ്ക്ക് 2.30 ന് നടക്കുന്ന ചടങ്ങിൽ മെഡിക്കൽ ട്രസ്റ്റ് മാനേജിംഗ് ഡയറക്ടർ പി.വി. ആന്റണി അദ്ധ്യക്ഷത വഹിക്കും.