നെടുമ്പാശേരി: ചെങ്ങമനാട്, കുറുമശേരി മേഖലയിലെ സി.സി ടി.വി കാമറകൾ പ്രവർത്തന സജ്ജമാക്കണമെന്ന് കേരള വ്യാപാരി വ്യവസായി ഏകോപനസമിതി വനിതാവിംഗ് കുറുമശേരി യൂണിറ്റ് വാർഷികം ആവശ്യപ്പെട്ടു.
ചെങ്ങമനാട് പൊലീസ് അധികാരികളുടെ അഭ്യർത്ഥനയെത്തുടർന്ന് കുറുമശേരി യൂണിറ്റ് ഒരു ലക്ഷം രൂപയോളം ചെലവഴിച്ചാണ് കാമറകൾ സ്ഥാപിച്ചത്. ജില്ലാ പ്രസിഡന്റ് സുബൈദ നാസർ യോഗം ഉദ്ഘാടനം ചെയ്തു. യൂണിറ്റ് പ്രസിഡന്റ് ശാന്ത അപ്പു അദ്ധ്യക്ഷത വഹിച്ചു. വർഷങ്ങളായി ബിസിനസ് രംഗത്തുള്ള നാല്പതോളം വനിതകളെ പാറക്കടവ് ഗ്രാമപഞ്ചായത്ത് പ്രസിഡന്റ് റീന രാജൻ ആദരിച്ചു. ഏകോപനസമിതി യൂണിറ്റ് പ്രസിഡന്റ് എം.വി. മനോഹരൻ, പി.വി. സാജു, എ.ജി. ശശിധരൻ, പി.ജി. ശശിധരൻ, ജോജി പീറ്റർ, സി.പി. തരിയൻ, ജിഷ ശ്യാം, എൽസി മാത്യു തുടങ്ങിയവർ സംസാരിച്ചു. ഭാരവാഹികളായി ശാന്ത അപ്പുവിനെ പ്രസിഡന്റായും ശബാന രാജേഷിനെ ജനറൽ സെക്രട്ടറിയായും തിരഞ്ഞെടുത്തു.