കോലഞ്ചേരി: ഡെങ്കി പനിക്കാരുടെ എണ്ണം വർദ്ധിച്ചതോടെ പാഷൻ ഫ്രൂട്ടി​ന് നല്ലകാലം​. ആവശ്യക്കാരേറിയതോടെ കി​ഴക്കൻ മേഖലയി​ലെ നി​രവധി​ പച്ചക്കറി കർഷകർ പാഷൻ ഫ്രൂട്ട് കൃഷിയിലേയ്ക്ക് കടന്നു.

ഡെങ്കി പനിക്കാരി​ലെ രക്താണുവി​​ന്റെ കൗണ്ട് കൂട്ടിയെടുക്കുന്നതിന് ഡോക്ടർമാർ പാഷൻ ഫ്രൂട്ട് കഴിക്കാൻ നിർദേശി​ക്കുന്നുണ്ട്. അങ്ങി​നെയാണ് വലി​യ പ്രി​യമി​ല്ലാതി​രുന്ന സംഗതി​യുടെ കാലം തെളി​ഞ്ഞത്. കൃഷി പ്രോത്സാഹി​പ്പി​ക്കാൻ സംസ്ഥാന ഹോർട്ടികൾച്ചർ മിഷനും കൃഷിവകുപ്പും സജീവമായി രംഗത്തുമുണ്ട്.

കൃഷി​ക്കും എളുപ്പം, വലി​യ പരി​ചരണം വേണ്ടി​, കീടബാധ നന്നേ കുറവ്. നല്ല ഇനത്തി​ൽ നി​ന്ന് നല്ല വി​ളവ്. അങ്ങി​നെ ഗുണഗണങ്ങൾ ഏറെ. അതി​നി​ടെ ഇപ്പോൾ കി​ലോ നൂറുരൂപവരെ വി​ലയും കി​ട്ടും.

മുറ്റത്ത് നട്ട് ടെറസിൽ പന്തലിട്ടാൽ വീടിനകത്ത് നല്ല കുളിർമ കിട്ടും.

ഈർപ്പവും ജൈവാംശവും ഉള്ള മണ്ണിൽ നന്നായി വളരും. പാഷൻ ഫ്രൂട്ടിൽ നിന്നു വേർതിരിച്ചെടുക്കുന്ന പാസിഫ്ളോറിൻ എന്ന ഘടകം മാനസിക സമ്മർദം അക​റ്റാൻ സഹായിക്കുമെന്ന് പഠനങ്ങൾ പറയുന്നു.

വയല​റ്റ്, മഞ്ഞ എന്നീ നിറങ്ങളിലാണ് പാഷൻ ഫ്രൂട്ടുള്ളത്.

മഞ്ഞയ്ക്ക് പുളി കൂടുതലാണ്. വയല​റ്റി​ന് മധുരം പുളി​ക്ക് മുന്നി​ൽ നി​ൽക്കും.

നല്ല വിളവിന് ചെടി​ക്ക് ഒന്നര വർഷത്തെ വളർച്ച വേണം. പൂക്കൾ കായ്കളാകാൻ 3 മാസം. പ്രധാന വിളവെടുപ്പുകാലം മേയ് - ജൂൺ, സെപ്തംബർ - ഒക്ടോബർ മാസങ്ങളാണ്.

ഒരു വള്ളിയിൽനിന്നു ശരാശരി വിളവ് 7-8 കിലോഗ്രാം കായ്കൾ ലഭിക്കുമെന്ന് കടയിരുപ്പിലെ കർഷകനായ എം.വി മോഹനൻ പറഞ്ഞു. കിലോഗ്രാമിന് 60 മുതൽ 90 രൂപ വരെ വില ലഭിക്കുന്നുമുണ്ട്.

ധാരാളം മൂല്യവർധിത ഉൽപന്നങ്ങൾ നിർമിക്കാമെന്നതാണു പാഷൻ ഫ്രൂട്ടിനെ താരമാക്കിയത്. ജീവകം സി, എ എന്നിവ കൂടുതൽ അളവിൽ അടങ്ങിയിട്ടുണ്ട്. ജ്യൂസും ജെല്ലിയും സ്‌ക്വാഷും നിർമിക്കാൻ പാഷൻ ഫ്രൂട്ട് നല്ലതാണ്.മണവും നിറവും കൂട്ടാൻ രാസവസ്തുക്കൾ ആവശ്യമില്ലെന്നതാണു മറ്റൊരു പ്രത്യേകത.

നീരു പിഴിഞ്ഞെടുത്ത് പഞ്ചസാരയും വെള്ളവും ചേർത്തും കഴിക്കാം. പുറന്തോട് ഉണക്കി വറുത്ത് കൊണ്ടാട്ടമായി ഉപയോഗിക്കുന്നവരുമുണ്ട്. വിത്ത് പാകിയും തണ്ട് മുറിച്ചു നട്ടും നടാം. വിത്ത് മുളപ്പിച്ച തൈകളാണ് കൂടുതൽ നല്ലത്. വിത്ത് എളുപ്പത്തിൽ മുളയ്ക്കാൻ ഒരു ദിവസം നാരങ്ങാ നീരിൽ ഇട്ടു വയ്ക്കാം. മണ്ണും ചാണകപ്പൊടിയും ചകിരിച്ചോറും ചേർത്ത് ചട്ടിയിലും നടാം.