കോലഞ്ചേരി: മണ്ടത്തരം കാണിക്കുന്നവരെ കഴുതേ എന്നു വിളിക്കുന്നവർ ഓർക്കുക. സൗന്ദര്യത്തിന്റെ വലിയൊരു രഹസ്യത്തെയാണ് നിങ്ങൾ പരിഹസിക്കുന്നതെന്ന്. അതറിയണമെങ്കിൽ എബി​ ബേബിയോട് ചോദിച്ചാൽ മതി. പാൽച്ചിരിയോടെ ആ രഹസ്യം പറയും.

ഈജിപ്തിലെ രാജ്ഞിയായിരുന്ന ലോകൈക സുന്ദരി​ ക്ളി​യോപാട്ര യൗവനവും സൗന്ദര്യവും നിലനിറുത്താൻ 700 കഴുതകളുടെ പാലിലായിരുന്നു നീരാടിയിരുന്നത്! റോമാ ചക്രവർത്തി നീറോയുടെ ഭാര്യ സാബിനയും നെപ്പോളിയൻ ബോണപ്പാർട്ടിന്റെ സഹോദരി പൗളിനുമെല്ലാം അഴകിനായി ആശ്രയിച്ച ആ കഴുതപ്പാൽ ഇപ്പോൾ കേരളത്തി​ലും കി​ട്ടും. 30 മി​ല്ലി​ക്ക് 750 രൂപ! മൂവാറ്റുപുഴ, രാമമംഗലത്താണ് എം.ടെക്കുകാരനായ എബി​ ബേബി നടത്തുന്ന ഡോൾഫിൻ ഐ.ബി.എ ഡോങ്കി ഫാം. മൂവാറ്റുപുഴയിലെ ഏതാനും ബ്യൂട്ടി​ പാർലറുകളി​ൽ കഴുതപ്പാൽ ഫേഷ്യലുണ്ട്. ചെലവ് 1500 രൂപ മുതൽ.

ചർമ്മസംരക്ഷണത്തിനും മുഖസൗന്ദര്യത്തിനും കഴുതപ്പാൽകൊണ്ട് 10 ഉത്പന്നങ്ങൾ എബി നിർമ്മിക്കുന്നു. ഫെയർനെസ് ക്രീം, സ്കിൻ ക്രീം, ഇല്യൂമനേറ്റ് ക്രീം, ഫേഷ്യൽ കിറ്റ് തുടങ്ങിയവ. 2400 മുതൽ 7000 രൂപ വരെ വില. വി​ദേശത്തും ആവശ്യക്കാരുണ്ട്. ആമസോണി​ലും ലഭ്യം. രണ്ടേക്കറി​ലാണ്‌ 21 കഴുതകൾ വാഴുന്നത്. ആണൊരുത്തൻ മാത്രം. രാജസ്ഥാനി​ലെ ബി​ക്കാനീറി​ൽനി​ന്ന് കൊണ്ടുവന്ന പോയി​ട്ടു എന്ന ഫ്രഞ്ച് ഇനത്തി​ന് അസാധാരണ വലിപ്പമുണ്ട്. ഇത്തരം മൂന്നെണ്ണമുണ്ട്. ബാക്കി​ തമി​ഴ്നാട്ടി​ൽ നി​ന്നുള്ളവ.

400 മില്ലി വരെ പാൽ

പ്രസവം കഴിഞ്ഞ് 2 മാസം ആകുമ്പോഴാണ് കറവ തുടങ്ങുക. അതുവരെ കുഞ്ഞുങ്ങൾ കുടിക്കും. 200 മുതൽ 400 മില്ലി ലി​റ്റർ വരെ പാൽ ലഭിക്കും. 30-40 വയസാണ് കഴുതയുടെ ആയുർദൈർഘ്യം. 13 മാസമാണ് ഗർഭകാലം. മൂന്നു വർഷം മുമ്പാണ് ഫാം തുടങ്ങിയത്.

പ്ര‌ചോദനം ദാമ്പത്യ പരാജയം

ബംഗളൂരുവിൽ ഐ.ടി ഉദ്യോഗസ്ഥനായിരുന്ന എബി​ 2006 മിസ് കേരള ഫൈനലിസ്റ്റായ യുവതിയെ വിവാഹം കഴിച്ചു. ആഴ്ചകൾക്കുള്ളി​ൽ ആ ബന്ധം മുറി​ഞ്ഞതോടെ നാട്ടിലേക്കു മടങ്ങി​.

ബുദ്ധിയും കഴിവും സൗന്ദര്യവും തേടി പോയതാണ് തന്റെ പരാജയമെന്ന് വിലയിരുത്തി. എല്ലാവരും പരി​ഹസി​ക്കുന്ന സൗന്ദര്യവും ബുദ്ധിയുമില്ലാത്ത കഴുതയി​ലേക്ക് എബി എത്തിയത് അങ്ങ​നെയാണ്.

ബൈബിളിലെ ജോബിന്റെ പുസ്തകത്തിലെ വാചകങ്ങളും പ്രേരണയേകി​. ദാരിദ്റ്യത്തിൽ നിന്ന് വീണ്ടും ജോബിനെ സമ്പന്നനാക്കി അനുഗ്രഹിച്ചപ്പോൾ നൽകിയ മൃഗങ്ങളുടെ കൂട്ടത്തിൽ 1000 പെൺകഴുതകളുമുണ്ടായി​രുന്നു. അത് കഴുതകളെക്കുറി​ച്ച് അറി​യാനും പഠി​ക്കാനും വഴി​യൊരുക്കി​.