കോലഞ്ചേരി : കപ്പയ്ക്കും രാജയോഗം. നാട്ടിൽ വില കിലോ മുപ്പതു രൂപയാണെങ്കിൽ ഓൺലൈനിൽ മിനിമം 250 രൂപ.
കൃഷിയിടങ്ങളിൽ നിന്ന് കിലോയ്ക്ക് 20 - 22 രൂപയ്ക്കാണ് കച്ചവടക്കാർ കപ്പ വാങ്ങുന്നുണ്ട്. കഴിഞ്ഞ വർഷം 10 -15 ആയിരുന്നു വില. വിലയിലെ ഉണർവ് കപ്പ കൃഷിക്കാർക്ക് വലിയ ആശ്വാസമാണ്. പ്രളയത്തിൽ കപ്പ കൃഷിക്കുണ്ടായ നാശമാണ് ഇപ്പോൾ വില ഉയർത്തിയത്. ഇനിയും വില ഉയരാനാണ് സാധ്യതയും.

മലയാളിയുടെ പ്രിയപ്പെട്ട കപ്പക്കിഴങ്ങ് പ്രമുഖ ഓൺലൈൻ ഷോപ്പിങ് സൈ​റ്റായ ആമസോണിലും വിൽപനയ്‌ക്കെത്തി. പഞ്ച നക്ഷത്ര ഹോട്ടലുകളിൽ സൂപ്പർസ്​റ്റാറായി വിലസിയ കപ്പ ആമസോണിലേയ്‌ക്കെത്തുമ്പോൾ വിലകേട്ടാൽ ഞെട്ടും. കിലോ 429 രൂപ, 14 % ഡിസ്‌കൗണ്ട് കഴിച്ച് 369 രൂപയ്ക്ക് വീട്ടിൽ കിട്ടും. ഡിസ്കൗണ്ട്കഴിഞ്ഞ് 250 രൂപയ്ക്കും ചില സൈറ്റുകളിൽ കപ്പയുണ്ട്. കർഷകന് 20-22 വരെ ലഭിക്കുമ്പോഴാണ് ആമസോണിലെ മറിമായം. വില വർദ്ധനവിന്റെ കാരണവും ആമസോൺ പറയും. കപ്പയ്ക്ക് വില 30 ആയിരിക്കും. പക്ഷേ ഡെലിവറിയ്ക്കുള്ള ചിലവും,പാക്കിങ്ങിനും കവറിന്റെ പ്രിന്റിങ്ങിനുമുള്ള ചിലവും അടക്കമാണീ വില. ശുദ്ധ കേരള ജൈവ കപ്പയാണെന്നും വാഗ്ദാനം. മറ്റ് ഉല്പന്നങ്ങളെ പോലെയല്ല. വി​റ്റ കപ്പ ആമസോൺ തിരിച്ചെടുക്കില്ല.

കാർബോ ഹൈഡ്രേ​റ്റ്‌സ്, വൈ​റ്റമിൻസ്, മിനറൽസ് എന്നിവയാൽ സമ്പുഷ്ടമാണെന്നും കൊഴുപ്പും സോഡിയവും വളരെ കുറഞ്ഞ അളവിൽ മാത്രമേ ഉള്ളൂവെന്നുമൊക്കെയുള്ള വിവരങ്ങളും സൈറ്റിലുണ്ട്.

ചേനയ്ക്കും ചേമ്പിനും കാച്ചിലിനുമൊക്കെ ഇങ്ങിനെ എടുത്താൽ പൊങ്ങാത്ത വിലയിട്ട് ഓൺലൈനിൽ കച്ചവടം നടക്കുന്നുണ്ട്.