പറവൂർ : പ്രളയാനന്തര പുനർനിർമ്മാണ പ്രവർത്തനങ്ങളുടെ ഭാഗമായി പുനർജനി പറവൂരിന് പുതുജീവൻ പദ്ധതിയിൽ നിർമ്മിച്ച നാല് വീടുകളുടെ താക്കോൽ കൈമാറി. കോട്ടുവള്ളി പഞ്ചായത്തിലെ കൂനമ്മാവ് പാറക്കൽ ജോയ്, ചേന്ദമംഗലം പഞ്ചായത്തിലെ കരിമ്പാടം കൂവപ്പറമ്പിൽ അജിത ഭരതൻ, വടക്കേക്കര പഞ്ചായത്തിലെ മുറവൻതുരുത്ത് കളത്തിൽ സുനിത ശാന്തിലാൽ, തുരുത്തിപ്പുറം കൂവപ്പറമ്പിൽ ഷിബു എന്നിവർക്കാണ് വീടുകൾ നിർമ്മിച്ചുനൽകിയത്. വി.ഡി. സതീശൻ എം.എൽ.എ താക്കോൽദാനം നിർവഹിച്ചു.

ആസ്റ്റർ ഡി.എം. ഫൗണ്ടേഷൻ, റോട്ടറി ക്ളബ് എന്നിവയുടെ സംയുക്ത സാമ്പത്തിക സഹായത്തോടെയാണ് വീടുകളുടെ നിർമ്മാണം പൂർത്തിയാക്കിയത്. പഞ്ചായത്ത് പ്രസിഡന്റുമാരായ കെ.കെ. ശാന്ത, ടി.ജി. അനൂപ്, റോട്ടറി ക്ളബ് ഡിസ്ട്രിക്ട് ഗവർണർ മാധവ് ചന്ദ്രൻ, ജയശങ്കർ, എം.പി. മുരളീധരൻ, ശ്വേതാ വാസുദേവ്, ബിജു ജോൺ, അബ്ദുൾ സലാം മൂപ്പൻ, ലത്തീഫ് കാസിം, പി.ആർ. സൈജൻ, അനിൽ ഏലിയാസ് തുടങ്ങിയവർ പങ്കെടുത്തു.