പറവൂർ : പറവൂർ ഉപജില്ലാ കലോത്സവത്തിൽ ഹയർ സെക്കൻഡറി ജനറൽ വിഭാഗത്തിലും യു.പി, ഹൈസ്കൂൾ വിഭാഗം സംസ്കൃതോത്സവത്തിലും നന്ത്യാട്ടുകുന്നം എസ്.എൻ.വി സംസ്കൃതം ഹയർസെക്കൻഡറി സ്കൂൾ മുന്നിൽ. എൽ.പി, ഹൈസ്കൂൾ ജനറൽ വിഭാഗങ്ങളിൽ കരിമ്പാടം ഡി.ഡി.സഭ ഹൈസ്കൂളും യു.പി ജനറൽ വിഭാഗത്തിലും എൽ.പി അറബി കലോത്സവത്തിലും മന്നം ഇസ്‌ലാമിക് യു.പി സ്കൂളുമാണ് മുന്നിട്ടുനിൽക്കുന്നത്. ഇന്ന് മൈം, ഇംഗ്ലീഷ് സ്കിറ്റ്, നാടകം, ചവിട്ടുനാടകം എന്നിവ വേദി ഒന്നിലും ഭരതനാട്യം കുച്ചിപ്പുടി, കേരളനടനം എന്നിവ വേദി രണ്ടിലും നാടോടിനൃത്തം വേദി മൂന്നിലും സംഘഗാനം വേദി നാലിലും ഖുറാൻ പാരായണം, പദ്യം ചൊല്ലൽ, കഥപറയൽ, അറബിക്ഗാനം, ആംഗ്യപ്പാട്ട്, സംഘഗാനം, അറബിക് പദ്യംചൊല്ലൽ, അറബി പ്രസംഗം എന്നിവ വേദി അഞ്ചിലും മലയാളം പദ്യംചൊല്ലൽ വേദി ആറിലും ഹിന്ദി പ്രസംഗം, ഹിന്ദി, തമിഴ് പദ്യം ചൊല്ലൽ, തമിഴ്, കന്നഡ പ്രസംഗം, കന്നഡ പദ്യം ചൊല്ലൽ എന്നിവ വേദി ഏഴിലും നടക്കും.

കലോത്സവം നാളെ സമാപിക്കും. വൈകിട്ട് അഞ്ചിന് നടക്കുന്ന സമാപന സമ്മേളനം എസ്. ശർമ എം.എൽ എ ഉദ്ഘാടനം ചെയ്യും. പറവൂർ നഗരസഭാ ചെയർമാൻ രമേഷ് ഡി. കുറുപ്പ് അദ്ധ്യക്ഷത വഹിക്കും. നടൻ വിനോദ് കെടാമംഗലം സമ്മാനങ്ങൾ വിതരണം ചെയ്യും.