കൊച്ചി: മാരകരോഗങ്ങൾക്ക് വേദനാസംഹാരിയായി ഉപയോഗിക്കുന്ന ബെർപി ജെസിക് ആംപ്യൂൾ, ലഹരി ഉപയോഗത്തിനായി വില്പന നടത്തിയ യുവാവ് പിടിയിൽ. ആലുവ സ്വദേശി മനോജിനെയാണ് (41) കൊച്ചി സിറ്റി ഡാൻസാഫും പനങ്ങാട് പൊലീസും ചേർന്ന് നെട്ടൂരിൽ നിന്ന് പിടികൂടിയത്. ഇയാൾ വ്യാജ പ്രിസ്‌ക്രിപ്ഷൻ തയ്യാറാക്കി മെഡിക്കൽ സ്റ്റോറുകളിലും കൊച്ചിയിലെ ഹോസ്പിറ്റലുകളിൽ നിന്നും ആംപ്യൂളുകൾ വാങ്ങി വില്പന നടത്തുകയായിരുന്നു. കൊച്ചിയിൽ ലഹരി ഉപയോഗിക്കുന്നവർക്ക് അമിത വിലയ്ക്ക് നൽകുകയാണ് പതിവ്. പൊലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ കൊച്ചി സിറ്റി ഡെപ്യൂട്ടി കമ്മീഷണർ ജി.പൂങ്കുഴലിയുടെ നിർദ്ദേശപ്രകാരം ഡാൻസാഫ് എസ്.ഐ ജോസഫ് സാജൻ, പനങ്ങാട് എസ്.ഐ വിപിൻ കുമാർ എന്നിവരുടെ നേതൃത്വത്തിലാണ് പ്രതിയെ പിടികൂടിയത്. കൊച്ചിയിലും പരിസര പ്രദേശങ്ങളിലും ഇത്തരം മയക്കുമരുന്നു വില്പനക്കാരെയോ ഉപഭോക്താക്കളെക്കുറിച്ചോ വിവരം ലഭിച്ചാൽ 9497980430 എന്ന നമ്പറിൽ അറിയിക്കണമെന്നും അറിയിക്കുന്നവരുടെ വിവരങ്ങൾ രഹസ്യമായി സൂക്ഷിക്കുന്നതാണെന്നും ഡെപ്യൂട്ടി കമ്മീഷണർ അറിയിച്ചു.