കൊച്ചി: ഇന്ദിരാഗാന്ധി അനുസ്മരണം നടക്കുന്നതിനിടെ എറണാകുളം ഡി.സി.സിയിൽ കൈയാങ്കളി. കൊച്ചി മേയറെ മാറ്റുന്നതിനെ ചൊല്ലിയാണ് തർക്കമുണ്ടായത്. മുൻ എം.പി കെ.വി. തോമസ് അടക്കമുള്ള മുതിർന്ന നേതാക്കളുടെ സാന്നിദ്ധ്യത്തിലായിരുന്നു ബഹളം.

മേയർ സൗമിനി ജെയിനെ മാറ്റണമെന്ന് ആവശ്യപ്പെട്ട് ബ്ലോക്ക് വൈസ് പ്രസിഡന്റ് നോർമൻ ജോസഫ് രംഗത്തെത്തിയതോടെയാണ് ചടങ്ങ് അലങ്കോലമായത്. ഇന്ദിരാഗാന്ധി അനുസ്മരണ ചടങ്ങിൽ എൻ. വേണുഗോപാൽ സംസാരിച്ചു കഴിഞ്ഞ ഉടനെയാണ് അപ്രതീക്ഷിതമായി നോർമൻ ജോസഫ് മേയറെ ഉടൻ മാറ്റണമെന്ന് ആവശ്യപ്പെട്ട് ചാടിയെഴുന്നേറ്റത്. ഈ മേയറെ വച്ചുകൊണ്ട് ഇനിയും മുന്നോട്ടുപോകാനാവില്ലെന്നും അദ്ദേഹം പറഞ്ഞു. അനുസ്മരണ സമ്മേളനത്തിനിടെയുള്ള ഈ അപ്രതീക്ഷിത നടപടിയിൽ ചടങ്ങിൽ പങ്കെടുത്തവരെല്ലാം സ്തബ്ധരായി. കെ. ബാബു, ഡൊമിനിക് പ്രസന്റേഷൻ, മേയർ സൗമിനി ജെയിൻ തുടങ്ങിയവരും ചടങ്ങിലുണ്ടായിരുന്നു.

താനടക്കമുള്ളവരോട് പോലും മേയർ മാന്യമായി പെരുമാറുന്നില്ലെന്ന് നോർമൻ ജോസഫ് പരാതി ഉന്നയിച്ചു. ഇയാളെ പിടിച്ചുമാറ്റാൻ മറ്റു നേതാക്കൾ ശ്രമിച്ചെങ്കിലും അവരെ തള്ളി മാറ്റുകയായിരുന്നു. തുടർന്ന് ആക്രോശവും ഉന്തും തള്ളുമായി ചടങ്ങ് അലങ്കോലമായി. കൈയാങ്കളി നടത്തിയ ബ്ലോക്ക് വൈസ് പ്രസിഡന്റ് നോർമൻ ജോസഫിനെ ഡി.സി.സി പ്രസിഡന്റ് സസ്‌പെൻഡ് ചെയ്തു
കൊച്ചി മേയർ സൗമിനി ജെയിനെ മാറ്റുന്നതിനായി നേരത്തെ എറണാകുളത്തെ മുതിർന്ന നേതാക്കൾ കെ.പി.സി.സി.യെ സമീപിച്ചിരുന്നു. ഒരു വിഭാഗം കൗൺസിലർമാർ സൗമിനി ജെയിന് അനുകൂലമായി നിലയുറപ്പിച്ചതോടെ തർക്കം രൂക്ഷമായി. ഹൈബി ഈഡൻ എം.പിയടക്കമുള്ളവർ സൗമിനി ജെയിനെതിരെ പരസ്യമായി രംഗത്തുവരികയും ചെയ്തിരുന്നു.