ഇടുക്കി: ദേശീയ നിയമ സേവന അതോറിറ്റിയുടെ നേതൃത്വത്തിൽ രാജ്യമൊട്ടാകെ സംഘടിപ്പിച്ച് വരുന്ന ദേശീയ ലോക് അദാലത്ത് ജില്ലാ നിയമ സേവന അതോറിറ്റിയുടെ ആഭിമുഖ്യത്തിൽ തൊടുപുഴ, കട്ടപ്പന, പീരുമേട്, ദേവികുളം എന്നീ കോടതി കേന്ദ്രങ്ങളിൽ നടക്കും. പ്രത്യേകം ഒരുക്കിയിട്ടുള്ള 25 ബൂത്തുകളിലായി 7500 കേസുകൾ പരിഗണിക്കും. വിവിധ കോടതികളുടെ പരിഗണനയിലുള്ളതും അല്ലാത്തതുമായ സിവിൽ, ക്രിമിനൽ, വാഹന അപകട ഇൻഷുറൻസ്, കുടുംബ തർക്കം, റവന്യൂ റിക്കവറി, മുദ്രവില കുറച്ച് കാണിച്ചതുമായി ബന്ധപ്പെട്ട് രജിസ്‌ട്രേഷൻ വകുപ്പിലുള്ള കേസുകളും പരിഗണിക്കും. കേസുകളുമായി ബന്ധപ്പെട്ടവർ അതത് കേന്ദ്രങ്ങളിൽ ഇന്ന് രാവിലെ 10ന് ഹാജരാകണം. പണച്ചെലവില്ലാതെ കേസുകൾ ഒത്തുതീർപ്പിലൂടെ അപ്പീലില്ലാതെ തീർപ്പാക്കുന്ന അദാലത്തിന്റെ പ്രയോജനം പരമാവധി ഉപയോഗപ്പെടുത്തണമെന്ന് ജില്ലാ നിയമ സേവന അതോറിട്ടി ചെയർമാനും ജില്ലാ ജഡ്ജിയുമായ മുഹമ്മദ് വസീം, സെക്രട്ടറി ദിനേശ് എം പിള്ള എന്നിവർ അറിയിച്ചു.