ഇടുക്കി : സാങ്കേതികത്വത്തിൽ കുടുങ്ങി പണി മന്ദീഭവിച്ചിരുന്ന വട്ടവട മാതൃകാ ഗ്രാമം പദ്ധതി പ്രവർത്തനത്തിന് പുതിയ ഗതിവേഗം. എസ്. രാജേന്ദ്രൻ എം.എൽ.എമുൻകൈ എടുത്ത് വട്ടവട ഗ്രാമപഞ്ചായത്തും എൽ.എസ്.ജി.ഡി എഞ്ചിനീയറിംഗ് വിഭാഗവും ചേർന്ന് ആസൂത്രണം ചെയ്ത അതിനൂതനമായ പദ്ധതിയാണ് വട്ടവട മോഡൽ വില്ലേജ്.
വളരെയേറെ പരിതാപകരമായ അവസ്ഥയിൽ കൂട്ടുകുടുംബങ്ങളായി താമസിക്കുന്ന 108 പട്ടികജാതി കുടുംബങ്ങൾക്കും 15 ജനറൽ കുടുംബങ്ങൾക്കും മെച്ചപ്പെട്ടതും ആധുനികമായതുമായ പാർപ്പിട സമുച്ചയം നിർമ്മിച്ച് നൽകുക എന്നതാണ് വട്ടവട മാതൃകാ ഗ്രാം പദ്ധതി ലക്ഷ്യമിടുന്നത്. അതുവഴി വട്ടവടയിലെ നാട്ടുകാരുടെ ഭൗതിക സാഹചരളം ഉയർത്തി നാടിന്റെ പുരോഗതി കൈവരിക്കാനാകും. ജില്ലാകലക്ടറുടെ അദ്ധ്യക്ഷതയിൽ ചേർന്ന യോഗത്തിൽ സമയബന്ധിതമായി നിർമ്മാണ പ്രവർത്തനം നടത്താൻ വഴിയൊരുങ്ങി. എം.എൽ.എ ആസ്തി വികസന ഫണ്ട് ഒരു കോടി, ഭവന നിർമ്മാണം (എസ്.സി ഫണ്ട്) അഞ്ച് കോടി, അംബേദ്ക്കർ സാങ്കേതിക വികസന പരിപാടി (എം.പി) ഒരു കോടി, അംബേദ്ക്കർ സാങ്കേതിക വികസന പരിപാടി (എം.എൽ.എ) രണ്ട് കോടി, കുടിവെള്ളവും ശുചിത്വവും (ജലനിധി) ഒരു കോടി, തൊഴിലുറപ്പ് പദ്ധതി ഒരു കോടി, വൃക്ഷത്തൈ നടീൽ (തൊഴിലുറപ്പ് പദ്ധതി) ഒരു ലക്ഷം, ഗേറ്റും ചുറ്റുവേലിയും ( എം.എൽ.എ എസ്.ഡി.എഫ് ഫണ്ട് ) അഞ്ച് ലക്ഷം, തെരുവ് വിളക്ക് എം.എൽ.എ എസ്.ഡി.എഫ് ഫണ്ട് 15 ലക്ഷം എന്നിങ്ങനെ 11 കോടി 21 ലക്ഷം രൂപയാണ് പദ്ധതി അടങ്കൽ തുക. പദ്ധതി നിർമ്മാണം ആരംഭിക്കേണ്ടുന്ന സൈറ്റിൽ കോണ്ടൂർ സർവ്വെ പൂർത്തിയാക്കുകയും ടെറൈൻ ലെവൽ ചെയ്ത് പ്ലോട്ടിനെ തട്ടുകളായി തിരിച്ചു. വീടുകൾ, കമ്മ്യൂണിറ്റി ഹാൾ, അമിനിറ്റി സെന്ററ്, കളിസ്ഥലം എന്നിവയുടെ നിർമ്മാണത്തിനായി ബേസ്‌മെന്റ് ഗ്രേഡ് ലെവൽ ചെയ്തു. റോഡിനും സംരക്ഷണ ഭിത്തിക്കും വേണ്ടിയുള്ള എക്സ്‌കവേഷൻ പൂർത്തിയാക്കി. ഡി.പി.ആർ പ്രകാരം എം.ജി.എൻ.ആർ.ഇ.ജി.എസ് തൊഴിലാളികളെക്കൂടി ഉൾപ്പെടുത്തി ഫൗണ്ടേഷൻ വർക്ക് ആരംഭിച്ച് പ്രവർത്തനങ്ങൾ പുരോഗമിച്ച് വരുന്നു. യോഗത്തിൽ എസ് രാജേന്ദ്രൻ എംഎൽഎ, ജില്ലാ കളക്ടർ എച്ച് ദിനേശൻ, ജില്ലാ പട്ടികജാതി വികസന ഓഫീസർ ആർ രഘു, വട്ടവട ഗ്രാമപഞ്ചായത്ത് സെക്രട്ടറി ആർ നന്ദകുമാർ, ജില്ലാ ഇൻഫർമേഷൻ ഓഫീസർ എൻ സതീഷ് കുമാർ, തുടങ്ങിയവർ പങ്കെടുത്തു.