വാഴൂർ: ചിറക്കടവ്, വാഴൂർ പഞ്ചായത്ത് പരിധിയിൽ വഴിവിളക്കുകൾ ഭൂരിഭാഗവും തെളിയുന്നില്ല. സോഡിയം വേപ്പർ വിളക്കുകൾ ഉൾപ്പെടെയുള്ളവയ്ക്ക് പഞ്ചായത്തുകൾ കെ.എസ്.ഇ.ബി.ക്ക് വൈദ്യുതിചാർജ് നൽകുന്നതാണെങ്കിലും ജനങ്ങൾക്ക് പ്രയോജനപ്പെടുന്നില്ല. ഇവയുടെ പരിപാലനം യഥാസമയം നടത്താത്തതാണ് തെരുവുവിളക്കുകൾ കൂട്ടത്തോടെ തകരാറിലാകാൻ കാരണം.
ഇതുകൂടാതെ എം.എൽ.എ ഫണ്ടുപയോഗിച്ച് ഇരുപഞ്ചായത്തുകളിലും ഹൈമാസ്റ്റ് ലൈറ്റുകൾ സ്ഥാപിച്ചിട്ടുണ്ടെങ്കിലും ഇവ പ്രവർത്തനക്ഷമമാക്കിയിട്ടില്ല. ഇവയെങ്കിലും തെളിച്ചാൽ വഴിയാത്രക്കാർക്ക് ഉപകാരമാകും. ഇപ്പോൾ തെരുവുവിളക്കുകൾ ഇല്ലാത്തതുമൂലം രാത്രി ഗ്രാമീണപാതകളിൽ സാമൂഹികവിരുദ്ധ ശല്യവുമേറി. ഇതുമൂലം രാത്രി വഴിയിലിറങ്ങാൻ ഭയമാണെന്ന് നാട്ടുകാർ പറയുന്നു.

പ്രധാന ജംഗ്ഷനുകളിൽ സോഡിയം വേപ്പർ ലാമ്പും ഹൈമാസ്റ്റ് ലൈറ്റുകളുമൊക്കെ സ്ഥാപിച്ചിട്ടുണ്ടെങ്കിലും ഒന്നും നാട്ടുകാർക്ക് ഗുണം ചെയ്യുന്നില്ല. റോഡുകളുടെ അവസ്ഥയും പരിതാപകരമാണ്. മിക്ക റോഡുകളും തകർന്നു .അപകടങ്ങളും മോഷ്ടാക്കളുടെ ശല്യവും മൂലം പൊട്ടിപ്പൊളിഞ്ഞ റോഡിലൂടെ കൂരിരുട്ടത്തുള്ള യാത്ര ഒഴിവാക്കണമെന്ന് പൊലീസും പറയുന്നു. വഴിവിളക്കുകൾ തെളിയിക്കാൻ അടിയന്തിര നടപടി ഉണ്ടാകണമെന്നാണ് നാട്ടുകാരുടെ ആവശ്യം.

 ഇരുപഞ്ചായത്തുകളിലേയും മിക്ക റോഡുകളിലും വഴിവിളക്കുകൾ തെളിയുന്നില്ല

 പരിപാലനം യഥാസമയം നടത്താത്തതാണ് തെരുവുവിളക്കുകൾ കൂട്ടത്തോടെ തകരാറിലാകാൻ കാരണം

 സാമൂഹ്യവിരുദ്ധ ശല്യവും രൂക്ഷം

 റോഡുകളും തകർന്നു