നോയ്ഡ: ഉത്തർപ്രദേശി​ലെ ഗ്രേറ്റർ നോയിഡയിൽ പ്രശസ്ത നാടൻപാട്ടുകാരി വെടിയേറ്റ്​ മരിച്ചു. സുഷമ(25) ആണ്​ ബൈക്കിലെത്തിയ അജ്ഞാതരുടെ വെടിയേറ്റ്​ മരിച്ചത്​. പരിക്കുകളോടെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ചൊവ്വാഴ്ച രാത്രി 8.30നായിരുന്നു സംഭവം. രണ്ട് ബൈക്കുകളിലായാണ് പ്രതികളെത്തിയത്. ഇത് രണ്ടാംതവണയാണ് സുഷമ ആക്രമിക്കപ്പെടുന്നതെന്ന് പൊലീസ് സൂപ്രണ്ട് പറഞ്ഞു. ഇക്കഴിഞ്ഞ ആഗസ്റ്റ് 10ന് ബുലന്ദ്​ശഹറിലെ മെഹ്​സാന ഗ്രാമത്തിലെ പരിപാടിക്കിടെയായിരുന്നു ആദ്യ ആക്രമണം. ഈ സംഭവത്തിൽ കേസെടുത്തിരുന്നെങ്കിലും പ്രതികളെ അറസ്റ്റ് ചെയ്തിരുന്നില്ല. ഭർത്താവിൽ നിന്ന്​ വിവാഹ മോചനം നേടിയ സുഷമ ഇപ്പോൾ മറ്റൊരാളോടൊപ്പമാണ്​ താമസമെന്നും പൊലീസ്​ പറഞ്ഞു.