കൊച്ചി: നടൻ ഷെയ്ൻ നിഗമും നിർമാതാവ് ജോബി ജോർജും തമ്മിലുള്ള തർക്കത്തിൽ ഒത്തുതീർപ്പായി. ജോബി ജോർജിന്റെ വെയിൽ എന്ന ചിത്രം ഷെയ്ൻ പൂർത്തിയാക്കും. എന്നാൽ ജോബിയുടെ തന്നെ അടുത്ത ചിത്രത്തിൽ നിന്നും ഷെയ്ൻ പിൻമാറി. ഇപ്പോൾ ചെയ്തുകൊണ്ടിരിക്കുന്ന കുർബാനിയുടെ ചിത്രീകരണം നവംബർ 10 ന് പൂർത്തിയായ ശേഷം നവംബർ 16 മുതൽ ജോബിയുടെ വെയിൽ എന്ന ചിത്രത്തിൽ ഷെയ്ൻ അഭിനയിക്കും.

താരസംഘടനയായ അമ്മയുടെയും നിർമ്മാതാക്കളുടെ സംഘടനയായ കേരള ഫിലിം പ്രൊഡ്യൂസേഴ്സ് അസോസിയേഷന്റെയും നേതൃത്വത്തിൽ കൊച്ചിയിൽ ചേര്‍ന്ന ചർച്ചയിലാണ് പ്രശ്നത്തിന് പരിഹാരമായത്.

പ്രശ്നങ്ങൾ പറഞ്ഞു ഒത്തു തീർപ്പാക്കിയെന്നും കരാർ പ്രകാരം ഷെയിൻ നിഗത്തിന് നല്‍കാനുണ്ടായിരുന്ന 40 ലക്ഷത്തിൽ 24 ലക്ഷം രൂപ നല്‍കിയെന്നും ഇനി 16 ലക്ഷം കൂടി നല്‍കുമെന്നും ജോബി ജോർജ് വ്യക്തമാക്കി.

ചർച്ചയിൽ തൃപ്തിയും സന്തോഷവും ഉണ്ടെന്നു ഷൈൻ നിഗവും പ്രതികരിച്ചു. 'വെയിൽ സിനിമയുടെ തുടക്കവും മുതൽ പ്രശ്നങ്ങൾ ഉണ്ടായിരുന്നു'. ഇപ്പോൾ എല്ലാം പരിഹരിച്ചതായും ഷെയ്ൻ കൂട്ടിച്ചേർത്തു. അമ്മയുടെയും കേരള ഫിലിം പ്രൊഡ്യൂസർ അസോസിയേഷന്റെയും പ്രതിനിധികളും ചിത്രീകരണം തീരും വരെ ഇവർക്കിടയിൽ മധ്യസ്ഥത നിൽക്കാനും തീരുമാനമായി.