സോഷ്യൽ മീഡിയയിൽ ഇപ്പോൾ താരം പൂർണിമ ഇന്ദ്രജിത്താണ്. കാരണം മറ്റൊന്നുമല്ല, താരത്തിന്റെ വ്യത്യസ്തങ്ങളായ ചിത്രങ്ങളാണ് പൂർണിമ ഇപ്പോൾ സോഷ്യൽ മീഡിയ പ്ലാറ്റ്ഫോമുകളിലൂടെ പങ്കുവയ്ക്കുന്നത്. ഇതിനിടെ, ഇന്നാണ് താരത്തിന്റെ മൂത്തമകൾ പ്രാർത്ഥന ഇന്ദ്രജിത്തിന്റെ പിറന്നാൾ. കുടുംബം മുഴുവൻ കുഞ്ഞു താരത്തിന്റെ പിറന്നാൾ ആഘോഷിക്കുന്ന തിരക്കിലാണ്. സോഷ്യൽ മീഡിയ നിറയെ പാത്തു എന്ന് വിളിക്കുന്ന പ്രാർഥനയ്ക്കുള്ള ആശംസാ പ്രവാഹമാണ്. അതിൽ ശ്രദ്ധേയം പൂർണിമയും പൃഥ്വിരാജും പങ്കുവച്ചിരിക്കുന്ന ചിത്രങ്ങളോട് കൂടിയുള്ള പിറന്നാൾ സന്ദേശമായിരുന്നു. ചിത്രത്തിൽ നിറവയറോടെ നിൽക്കുന്ന പൂർണിമ.പക്ഷേ ചിത്രം കുറച്ചു പഴയതാണെന്ന് മാത്രം.പ്രാർഥന തന്റെ ഉദരത്തിൽ വളരുന്ന കാലത്തെ ചിത്രത്തിനൊപ്പം 'നീയെന്നെ സുന്ദരിയാക്കി, ആദ്യത്തെ കൺമണിയ്ക്ക് പിറന്നാൾ ആശംസകൾ' എന്നുമായിരുന്നു പൂർണിമ കുറിച്ചത്.

ഗർഭകാലത്തെ അവശതകൾ മുഖത്ത് നിഴലിക്കുന്ന ചിത്രമാണെങ്കിലും അതീവ സന്തോഷത്തോടെ നിൽക്കുന്ന പൂർണിമയെ ആണ് ചിത്രത്തിലുള്ളതെന്ന് ആരാധകർ പറയുന്നു.പൂർണിമ പങ്കുവെച്ച ചിത്രത്തോളം തന്നെ ആരാധകർ ഏറ്റെടുത്ത മറ്റൊരു ചിത്രം പൃഥ്വിരാജ് പങ്കുവെച്ചതായിരുന്നു. ഇന്ദ്രജിത്തിന്റെ സഹോദരനും പ്രാർഥനയുടെ കൊച്ചച്ചനുമായ പൃഥ്വിയും പാത്തുവിന് ആശംസകളുമായി എത്തിയിരിക്കുകയാണ്. പാത്തു ജനിച്ച ഉടനെയുള്ള ചിത്രങ്ങളായിരുന്നു താരം പങ്കുവെച്ചത്. കുഞ്ഞിന്റെ ഒപ്പം ചിരിച്ച് കൊണ്ട് കിടക്കുന്ന ചിത്രത്തിനൊപ്പം 'ഇതൊക്കെ കാണുമ്പോൾ ലേബർ റൂമിൽ നിന്നും നിന്നെ പുറത്ത് കൊണ്ട് വന്നപ്പോൾ കണ്ടത് ഇന്നലെ കഴിഞ്ഞത് പോലെ തോന്നുകയാണെന്നും' പൃഥ്വിരാജ് കുറിച്ചു. പൃഥ്വിയുടെ പോസ്റ്റിന് താഴെ 'താങ്ക്യൂ കൊച്ചച്ച' എന്ന് പറഞ്ഞ് നന്ദി അറിയിച്ച് കൊണ്ട് പ്രാർഥനയും എത്തി.