ന്യൂഡൽഹി: രാജ്യം നേരിടുന്ന സാമ്പത്തിക പ്രതിസന്ധിയിൽ കേന്ദ്രസർക്കാരിനെതിരെ കോൺഗ്രസ് രാജ്യവ്യാപകമായി പ്രക്ഷോഭത്തിന് ഒരുങ്ങുമ്പോൾ മുൻ അദ്ധ്യക്ഷൻ രാഹുൽ ഗാന്ധി വിദേശസന്ദർശനത്തിന്.. തിങ്കളാഴ്ചയാണ് വ്യക്തിപരമായ ആവശ്യങ്ങൾക്കായി രാഹുൽ ഗാന്ധി വിദേശത്തേക്ക് പുറപ്പെട്ടത്.

എന്നാൽ രാഹുൽഗാന്ധി ഒരാഴ്ചക്കകം തിരിച്ചെത്തുമെന്നും നവംബർ ആദ്യവാരത്തിൽ പ്രക്ഷോഭത്തിന്റെ ഭാഗമാകുമെന്നും കോൺഗ്രസ് അറിയിച്ചു. രാഹുൽ എല്ലാവർഷവും ധ്യാനത്തിനായി ഈ സന്ദർശനം നടത്താറുണ്ടെന്നും കോൺഗ്രസ് നേതാവ് രൺദീപ് സിംഗ് സു‌ർജേവാല അറിയിച്ചു.

സാമ്പത്തിക മാന്ദ്യ വിഷയത്തിലുള്ള പ്രക്ഷോഭം പ്രഖ്യാപിച്ചത് രാഹുൽഗാന്ധിയുടെ മാർഗ നിർദ്ദേശ പ്രകാരമാണെന്നും സുർജേവാല വ്യക്തമാക്കി.

സാമ്പത്തിക മാന്ദ്യ വിഷയത്തിൽ നവംബർ ഒന്നുമുതൽ എട്ടുവരെ കോൺഗ്രസ് രാജ്യത്തുടനീളം 35 വാർത്താ സമ്മേളനങ്ങൾ നടത്തും. രാജ്യത്തിന്റെ നിലവിലെ സാമ്പത്തികാവസ്ഥ തുറന്നുകാട്ടുന്ന പരിപാടികൾ നവംബർ 5 മുതൽ 15 വരെ നടത്തുമെന്നും കോൺഗ്രസ് പ്രഖ്യാപിച്ചിരുന്നു.

നേരത്തെ ഹരിയാന, മഹാരാഷ്ട്ര നിയമസഭ തിരഞ്ഞെടുപ്പുകളുടെ പ്രചാരണം നടന്ന ഒക്ടോബർ ആദ്യമാസവും രാഹുൽ വിദേശ യാത്രയ്ക്ക് പോയത് വിവാദമായിരുന്നു.