കുന്നത്തൂർ: കൊഞ്ചിയും കരഞ്ഞും ചിരിച്ചുല്ലസിച്ചും നൂറുകണക്കിന് കുരുന്നുകൾ കുന്നത്തൂർ താലൂക്ക് ആദ്യക്ഷരം കുറിച്ചു. വിവിധ ക്ഷേത്രങ്ങൾ പുലർച്ചെ തന്നെ ഹരിശ്രീ കുറിക്കാനെത്തിയ കുരുന്നുകളെയും രക്ഷിതാക്കളെയും കൊണ്ട് നിറഞ്ഞിരുന്നു. വിപുലമായ ഇതിനായി ഏർപ്പെടുത്തിയിരുന്നത്.

കുന്നത്തൂർ നെടിയവിള ഭഗവതി ക്ഷേത്രം, മൈനാഗപ്പളളി മണ്ണൂർക്കാവ് ക്ഷേത്രം, പോരുവഴി പനപ്പെട്ടി ആശ്രമം ദേവീക്ഷേത്രം, ശാസ്താംകോട്ട ധർമ്മശാസ്താ ക്ഷേത്രം, കാരാളിമുക്ക് കോതപുരം തലയിണക്കാവ് ശിവപാർവതീ ക്ഷേത്രം, ആനയടി പഴയിടം നരസിംഹസ്വാമി ക്ഷേത്രം, പടിഞ്ഞാറെ കല്ലട തിരുവാറ്റ മഹാദേവർ ക്ഷേത്രം, ഭരണിക്കാവ് ഭദ്രകാളി ക്ഷേത്രം, ശൂരനാട് വടക്ക് കരിങ്ങാട്ടിൽ ശിവപാർവതീ ക്ഷേത്രം, കോമളവല്ലീശ്വരം ക്ഷേത്രം, അഴകിയകാവ് ക്ഷേത്രം, ശൂരനാട് തെക്ക് കുമരഞ്ചിറ ക്ഷേത്രം, ഐവർകാല കിഴക്ക് കീച്ചപ്പള്ളിൽ ക്ഷേത്രം, പുത്തനമ്പലം ദേവീക്ഷേത്രം എന്നിവിടങ്ങളിലാണ് പ്രധാനമായും വിദ്യാരംഭ ചടങ്ങുകൾ നടന്നത്.

തലയിണക്കാവ് ശിവപാർവതീക്ഷേത്രത്തിൽ നടന്ന ചടങ്ങുകൾക്ക് ശാസ്താംകോട്ട ദേവസ്വം ബോർഡ് കോളേജ് മുൻ പ്രിൻസിപ്പാൾ ഡോ.ബി. ജനാർദ്ധനൻപിള്ള, ക്ഷേത്രം മേൽശാന്തി രതീഷ് എന്നിവർ കാർമികത്വം വഹിച്ചു. കുന്നത്തൂർ നെടിയവിള ക്ഷേത്രം, പനപ്പെട്ടി ആശ്രമം ക്ഷേത്രം, മൈനാഗപ്പള്ളി മണ്ണൂർക്കാവ് ക്ഷേത്രം, ആനയടി ക്ഷേത്രം എന്നിവിടങ്ങളിൽ നടന്നു വന്ന നവരാത്രി സംഗീതോത്സവത്തിനും സമാപനമായി.

കുന്നത്തൂർ ഐവർകാല പുത്തനമ്പലം ദേവീക്ഷേത്രം, കീച്ചപ്പള്ളിൽ ദേവീക്ഷേത്രം, കുന്നത്തൂർ കിഴക്ക് കൊക്കാംകാവ് ക്ഷേത്രം, പോരുവഴി പെരുവിരുത്തി മലനട, അമ്പലത്തുംഭാഗം ധർമ്മശാസ്താ ക്ഷേത്രം, കണത്താർകുന്നം മഹാദേവർ ക്ഷേത്രം, പള്ളിശ്ശേരിക്കൽ പാലമ്പള്ളിക്കാവ്, വടക്കൻ മൈനാഗപ്പള്ളി പാട്ടുപുരയ്ക്കൽ ക്ഷേത്രം എന്നിവിടങ്ങളിലും വലിയ തിരക്കാണ് അനുഭവപ്പെട്ടത്.