അമൃതപുരി: എൻജിനീയറിംഗ് പഠനത്തിന്റെയും ഗവേഷണത്തിന്റെയും മികവ് വർദ്ധിപ്പിക്കുന്നതിനും സാമൂഹ്യ വികസനത്തിന് പ്രയോജനപ്പെടുത്താനും അമൃത വിശ്വവിദ്യാപീഠവും നെതർലാന്റ്‌സിലെ ട്വെന്റെ സർവകലാശാലയും സഹകരിക്കും.

ധാരണാപത്രം അമൃത വിശ്വവിദ്യാപീഠം ചാൻസലർ മാതാ അമൃതാനന്ദമയീ ദേവിയും ട്വെന്റെ സർവകലാശാലാ ഇലക്ട്രിക്കൽ എൻജിനീയറിംഗ്, മാത്തമാറ്റിക്‌സ് ആന്റ് കമ്പ്യൂട്ടർ സയൻസ് ഫാക്കൽറ്റി ഡീൻ പ്രൊഫ. ജൂസ്റ്റ് കോക്കും നെതർലാന്റ്‌സിൽ ഒപ്പുവെച്ചു.
ഇരു സർവകലാശാലകളിലേയും വിദ്യാർത്ഥികൾക്ക് അടുത്ത വർഷം മുതൽ അമൃത-യുടി 3+2 മാസ്റ്റർ ഐ-ടെക് പ്രോഗ്രാമിന് അവസരം ലഭിക്കും. സ്റ്റുഡന്റ് എക്‌സ്‌ചേഞ്ച് പ്രോഗ്രാം, അമൃത ലിവ്-ഇൻ-ലാബ്‌സ്, ട്വെന്റെ യൂണിവേഴ്‌സിറ്റി ക്യൂരിയസ് യു സമ്മർ സ്‌കൂൾ എന്നീ സൗകര്യങ്ങൾ കുട്ടികൾക്ക് ലഭ്യമാക്കുന്നതിന് പുറമേ ട്വെന്റെ സർവ്വകലാശാലയുമായി സഹകരിച്ച് റിസ്‌ക്ക് മാനേജ്‌മെന്റ്, പർവേസീവ് സിസ്റ്റംസ്, ഇന്ററാക്ഷൻ ടെക്‌നോളജി എന്നിവയടക്കമുള്ള വിഷയങ്ങളിൽ ഗവേഷണവും നടത്തും.
ഇന്ത്യയിലെ ആദ്യ പത്തു സർവകലാശാലകളുടെ പട്ടികയിൽ തുടർച്ചയായ മൂന്നാം വർഷവും സ്ഥാനം നേടിയ അമൃതയും ലോകത്തിലെ ഏറ്റവും മികച്ച 200 സർവകലാശാലകളിലൊന്നായ ട്വെന്റെ സർവകലാശാലയും തമ്മിലുള്ള സഹകരണം ഈ രംഗത്തു കൂടുതൽ മുന്നേറ്റം സൃഷ്ടിക്കുവാൻ സഹായിക്കും.