അഞ്ചൽ: സംസ്ഥാന സ്കൂൾ ശാസ്ത്ര നാടക മത്സരത്തിൽ അഞ്ചൽ പുത്തയം ഓൾസെയിന്റ്സ് സ്കൂൾ ഒന്നാംസ്ഥാനം നേടി. രാസപദാർത്ഥങ്ങൾ ജീവരാശിയുടെ നന്മയ്ക്കാകണം എന്ന സന്ദേശത്തിന് രംഗഭാഷ്യമൊരുക്കിയാണ് പുത്തയം ഓൾസെയിന്റ്സ് എച്ച്.എസ്. സംസ്ഥാന സ്കൂൾ ശാസ്ത്ര നാടക മത്സരത്തിൽ ജേതാക്കളായത്. പീരിയോഡിക് ടേബിൾ അറ്റ് 150 എന്ന നാടകമാണ് ഇവർ അവതരിപ്പിച്ചത്. എട്ടംഗ വിദ്യാർത്ഥി സംഘം അരങ്ങിലെത്തിച്ച നാടകത്തിന്റെ രചന പ്രതീപ് കണ്ണംങ്കോടും സംവിധാനം അഭിലാഷ് പറവൂരുമാണ്. 15 ന് കൊല്ലത്ത് നടന്ന സംസ്ഥാന ശാസ്ത്ര നാടക മത്സരത്തിൽ കേരളത്തിലെ മികച്ച 14 ശാസ്ത്ര നാടകങ്ങളിൽ കൊല്ലം ജില്ലയെ പ്രതിനിധീകരിച്ചായിരുന്നു ഓൾസെയിന്റ്സ് മത്സരിച്ച് ജേതാക്കളായത്.