തൃശൂർ: രാജ്യത്ത് ആൾക്കൂട്ട കൊലപാതകങ്ങൾ വർദ്ധിക്കുന്നതിൽ ആശങ്ക അറിയിച്ച് പ്രധാനമന്ത്രിക്ക് കത്തെഴുതിയ സാഹിത്യനായകന്മാർ അടക്കമുള്ള 49 പ്രമുഖർക്കെതിരെ രാജ്യദ്രോഹക്കുറ്റം ചുമത്തി കേസെടുത്ത നടപടി ജനാധിപത്യവിരുദ്ധവും പൗരാവകാശങ്ങൾ ലംഘിക്കുന്നതും രാജ്യത്തെ ഏകാധിപത്യത്തിലേക്ക് നയിക്കാനുള്ള നീക്കത്തിന്റെ ഭാഗവുമാണെന് കേരള കോൺഗ്രസ് (എം) ഉന്നതാധികാര സമിതി അംഗവും മുൻ ഗവ. ചീഫ് വിപ്പുമായ അഡ്വ. തോമസ് ഉണ്ണിയാടൻ അഭിപ്രായപ്പെട്ടു.

കേരള കോൺഗ്രസ്സ് (എം) ജില്ലാ നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്റും പുഴയ്ക്കൽ ബ്ലോക്ക് പഞ്ചായത്ത് പ്രസിഡന്റുമായി സി.വി. കുരിയാക്കോസ് അദ്ധ്യക്ഷനായി. ജില്ലാ നേതാക്കളായ ജോൺസൻ കാഞ്ഞിരത്തിങ്കൽ, തോമസ് ആന്റണി, സി.ടി. പോൾ, ഇട്ട്യേച്ചൻ തരകൻ, തോമസ് ചിറമ്മൽ, അഡ്വ. കെ.വി. സെബാസ്റ്റ്യൻ, അഡ്വ. പയസ് മാത്യു, അഡ്വ. ജയിംസ് തോട്ടം, എ.എൽ. ആന്റണി, പ്രസാദ് പുലിക്കോട്ടിൽ എന്നിവർ പ്രസംഗിച്ചു.