മാള: സംസ്ഥാനത്തെ പ്രധാന സർപ്പാരാധനാ കേന്ദ്രങ്ങളിലൊന്നായ വടമ പാമ്പും മേയ്ക്കാട്ട് മനയിൽ വൻ തിരക്ക്. വ്രതശുദ്ധിയുടെ നാളുകളായ മണ്ഡലമാസത്തിന് മുന്നോടിയായുള്ള തുലാം ഒന്നിനാണ് വലിയ ഭക്തജന തിരക്ക് അനുഭവപ്പെട്ടത്. രാവിലെ മുതൽ മനയിൽ ദർശനത്തിനായി വലിയ നിരയാണ് ഉണ്ടായിരുന്നത്. സർപ്പബലിയും കദളിപ്പഴ നിവേദ്യവുമാണ് മനയിലെ പ്രധാനപ്പെട്ട വഴിപാട്. കൂടാതെ വെള്ള നിവേദ്യം, കൂട്ടുപായസം, പാൽപ്പായസം, മഞ്ഞൾപ്പൊടി ചാർത്തൽ, വിളക്ക് വെയ്ക്കൽ, നാഗ പ്രതിഷ്ഠ, പുഷ്പാഞ്ജലി, പ്രതിമ പൂജ, അഭിഷേകം, തുലാഭാരം, ചോറൂണ് എന്നിവയാണ് മറ്റു വഴിപാടുകൾ.

കാവുകളും വൻ വൃക്ഷങ്ങളും നിറഞ്ഞ മനയിലെ കിഴക്കിനിയിൽ നാഗസാന്നിദ്ധ്യമുണ്ടെന്നാണ് വിശ്വാസം. മനയിലെ ആചാരമനുസരിച്ച് മലയാള മാസം ഒന്നാം തിയതി എല്ലാ വിഭാഗം ഭക്തർക്കും ദർശനം അനുവദിക്കുന്നുണ്ട്. കൂടാതെ കന്നിമാസത്തിലെ ആയില്യം, മീനമാസത്തിലെ തിരുവോണം മുതൽ ഭരണി വരെയുള്ള ദിനങ്ങൾ, മേടമാസം പത്താം തിയതി എന്നീ ദിവസങ്ങളിലാണ് എല്ലാ വിഭാഗം ജനങ്ങളെയും കിഴക്കിനിയിൽ ദർശനത്തിന് അനുവദിക്കുന്നത്...