കൊടകര: മറ്റത്തൂർ പഞ്ചായത്ത് ഫ്രണ്ട് ഓഫീസിൽ ആധുനികവത്കരണത്തിന്റെ ഭാഗമായി സ്ഥാപിച്ച എം പോസ് മെഷീന്റെ ഔപചാരിക ഉദ്ഘാടനം പഞ്ചായത്ത് ഡെപ്യൂട്ടി ഡയറക്ടർ ജോയ് ജോൺ നിർവഹിക്കും. നാളെ രാവിലെ 10.30ന് നടക്കുന്ന ചടങ്ങിൽ പ്രസിഡന്റ് പി.സി. സുബ്രൻ അദ്ധ്യക്ഷനാകും. പഞ്ചായത്തിലേക്ക് നൽകാനുള്ള നികുതികളും ഫീസുകളും എ.ടി.എം കാർഡ് ഉപയോഗിച്ച് സ്വൈപ്പിംഗ് മെഷീൻ വഴി പൊതു ജനങ്ങൾക്ക് അടയ്ക്കുന്നതിനുള്ള സൗകര്യമാണ് ഇതോടെ ലഭിക്കുന്നത്. ഇതിനു പുറമേ ഗൂഗിൾ പേ, ഭീം, പേ.ടി.എം., മൊബിക്വിക്ക്, ഫോൺ പേ, പേസാപ്പ് തുടങ്ങിയ മൊബൈൽ ആപ്പുകൾ ഉപയോഗിക്കുന്നവർക്ക് പഞ്ചായത്തിൽ പ്രദർശിപ്പിച്ചിട്ടുള്ള ക്യൂ.ആർ.കോഡ് സ്കാൻ ചെയ്ത് നേരിട്ട് അക്കൗണ്ടിലേക്ക് തുക കൈമാറാനും കഴിയുന്ന വിധത്തിലാണ് എച്ച്.ഡി.എഫ്.സി ബാങ്കുമായി സഹകരിച്ച് മൊബൈൽ പോയിന്റ് ഒഫ് സെയിൽ സൗകര്യം ഏർപ്പെടുത്തിയിട്ടുള്ളത്. ഈ വർഷം മുതൽ പഞ്ചായത്തിലെ വിവിധ കേന്ദ്രങ്ങളിൽ സംഘടിപ്പിക്കുന്ന കളക്‌ഷൻ ക്യാമ്പുകളിലും നികുതി ഒടുക്കുന്നതിന് സ്വൈപ്പിംഗ് സംവിധാനം ലഭ്യമായിരിക്കുമെന്ന് സെക്രട്ടറി അറിയിച്ചു.