തൃശൂർ : രാമവർമ്മപുരം പൊലീസ് അക്കാഡമിയിൽ പരിശീലനം പൂർത്തിയാക്കിയ അസി. മോട്ടോർ വെഹിക്കിൾസ് ഇൻസ്‌പെക്ടർമാരുടെ പാസിംഗ് ഔട്ട് പരേഡ് നാളെ രാവിലെ 7.30 ന് അക്കാഡമി പരേഡ് ഗ്രൗണ്ടിൽ നടക്കും. മന്ത്രി എ.കെ ശശീന്ദ്രൻ സല്യൂട്ട് സ്വീകരിക്കും. ട്രാൻസ്‌പോർട്ട് കമ്മിഷണർ ഡി.ജി.പി ആർ. ശ്രീലേഖ, പൊലീസ് അക്കാഡമി ഡയറക്ടർ ഡോ. ബി. സന്ധ്യ എന്നിവരും അഭിവാദ്യം സ്വീകരിക്കും. ഒരു വനിതയടക്കം 85 പേരടങ്ങുന്ന ബാച്ച് ജൂലായ് മുതൽ നാല് മാസമാണ് വിവിധ മേഖലകളിൽ പരിശീലനം നേടിയത്. കായിക പരിശീലനത്തോടൊപ്പം റോഡ് സുരക്ഷ, മോട്ടോർ വാഹന നിയമങ്ങളും ചട്ടങ്ങളും, ഫോറൻസിക് സയൻസ്, യോഗ, വയർലസ് കമ്മ്യൂണിക്കേഷൻ, പ്രഥമ ശുശ്രൂഷ, അടിയന്തര ദുരന്തനിവാരണം തുടങ്ങിയവയിൽ ഇവർക്ക് പരിശീലനം നൽകിയിട്ടുണ്ട്. ഇവരിൽ മൂന്ന് പേർ എം ടെക്, രണ്ട് പേർ ബിരുദാനന്തര ബിരുദം, 27 പേർ ബിടെക്, നാല് പേർ എം.ബി.എ, നാല് പേർ ബിരുദം, 45 പേർ ഡിപ്ലോമ യോഗ്യത നേടിയവരാണ്.