തിരുവനന്തപുരം:കേരളത്തിലേക്ക് കൂടുതൽ നിക്ഷേപകരെ കണ്ടെത്താൻ ഒക്ടോബർ നാലിന് ദുബായിൽ നിക്ഷേപക സംഗമം സംഘടിപ്പിക്കുന്നു. പുതുതായി രൂപീകരിച്ച ഓവർസീസ് കേരളൈറ്റ്സ് ഇൻവെസ്റ്റ്മെന്റ് കമ്പനിയുടെ ആഭിമുഖ്യത്തിൽ നടക്കുന്ന സംഗമത്തിൽ മുഖ്യമന്ത്രി പിണറായി വിജയൻ പങ്കെടുക്കും. നോൺ കേരളൈറ്റ്സ് എമർജിംഗ് എന്റർപ്രണേഴ്സ് മീറ്ര് ( നീം) എന്ന സംഗമത്തിലേക്ക് വ്യത്യസ്ത മേഖലകളിൽ നിന്നുള്ളവരെ ക്ഷണിച്ചിട്ടുണ്ട്.

നിക്ഷേപ സൗഹൃദ സംസ്ഥാനമായ കേരളത്തിലേക്ക് ലോകമെമ്പാടുമുളള ഇടത്തരം പ്രവാസി മലയാളി സംരംഭകരിൽനിന്നും നിക്ഷേപം സ്വീകരിക്കാനുള്ള തീരുമാനത്തിന്റെ ഭാഗമാണ് ഇത്. മീ​റ്റിന് മുന്നോടിയായി കേരള നിയമസഭാ സ്പീക്കർ പി. ശ്രീരാമകൃഷ്ണൻ, വ്യവസായ വകുപ്പ് മന്ത്റി ഇ.പി. ജയരാജൻ എന്നിവരുടെ സഹകരണത്തോടെ സംസ്ഥാനത്തെ പുതിയ നിക്ഷേപ സാദ്ധ്യതകൾ പരിചയപ്പെടുത്തുന്നതിന് പ്രിപ്പറേ​റ്ററി മീ​റ്റിംഗ് നടത്തി. അതിലെ ചർച്ചയുടെ അടിസ്ഥാനത്തിൽ, ചട്ടക്കൂടിന് മുൻഗണന നൽകി സാദ്ധ്യവും ഫലപ്രദവുമായ പ്രൊജക്ടുകൾ മുഖ്യമന്ത്റി പങ്കെടുക്കുന്ന ചടങ്ങിൽ നിക്ഷേപകർക്ക് മുമ്പിൽ അവതരിപ്പിക്കും.

പ്രവാസി കേരളീയരുടെ അറിവും അനുഭവവും സംസ്ഥാനത്തിന്റെ വികസനത്തിന് ഉതകുമെന്നാണ് സർക്കാരിന്റെ പ്രതീക്ഷ. 2018 ജനുവരി 12, 13 തിയതികളിൽ നടന്ന പ്രഥമ ലോക കേരളസഭാ സമ്മേളനത്തിൽ ഉരുത്തിരിഞ്ഞ കാര്യക്ഷമമായ നിർദ്ദേശങ്ങൾ നടപ്പാക്കാൻ കേരള സർക്കാർ ഏഴ് വിഷയാധിഷ്ഠിത സ്റ്റാൻഡിംഗ് കമ്മി​റ്റികൾ രൂപീകരിച്ചിരുന്നു. ഈ കമ്മി​റ്റികൾ യോഗങ്ങൾ നടത്തുകയും 48 ശുപാർശകൾ നടപ്പിലാക്കുകയും ചെയ്തു. ഈ ശുപാർശകളിൽ നിന്ന് പ്രായോഗികത, ഫണ്ട് ലഭ്യത എന്നിവയുടെ അടിസ്ഥാനത്തിൽ നടപ്പാക്കാൻ സാദ്ധ്യമായ 10 ശുപാർശകൾ ലോക കേരളസഭ സെക്രട്ടേറിയേ​റ്റ് തെരഞ്ഞെടുത്തു. ഇതിൽ പ്രധാനപ്പെട്ട ശുപാർശയായിരുന്നു എൻ.ആർ.ഐ ഇൻവെസ്​റ്റ്‌മെന്റ് കമ്പനി രൂപീകരണം. ടൂറിസം, എയർപോർട്, എൻ.ആർ.ഐ ടൗൺഷിപ്പ്, പൊതുമേഖലാ സ്ഥാപനങ്ങൾ, മരുന്നുകൾ/മെഡിക്കൽ ഉപകരണങ്ങളുടെ നിർമ്മാണം തുടങ്ങിയ മേഖലകളിൽ നിക്ഷേപത്തിനായാണ് എൻ.ആർ.ഐ ഇൻവെസ്​റ്റ്‌മെന്റ് കമ്പനി മാതൃകമ്പനിയായി രൂപീകരിച്ചത്.