തിരുവനന്തപുരം: പാലായിൽ നടക്കുന്ന സംസ്ഥാന ജൂനിയർ കായികമേളയ്ക്കിടെ ഹാമർ കൊണ്ട് പരിക്കേറ്റ വിദ്യാർത്ഥിക്ക് ആവശ്യമായ എല്ലാ ചികിത്സാ സൗകര്യവും സർക്കാർ ഒരുക്കുമെന്ന് കായികമന്ത്രി ഇ.പി ജയരാജൻ അറിയിച്ചു. ഇതിനായി കോട്ടയം ജില്ലാ കലക്ടറെ ചുമതലപ്പെടുത്തി. കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ് പരിക്കേറ്റ അഫീൽ ജോൺസൺ.

ഇത്തരമൊരു അപകടമുണ്ടായത് ഏറെ ഖേദകരമാണ്. കായികമേളകൾക്കിടയിൽ വേണ്ടതായ സുരക്ഷാ നടപടികൾ സ്വീകരിക്കേണ്ടതുണ്ട്. അപകടം നടന്ന സാഹചര്യം പരിശോധിക്കും. അധികൃതരുടെ ഭാഗത്ത് വീഴ്ച ഉണ്ടായിട്ടുണ്ടെങ്കിൽ കർശന നടപടി സ്വീകരിക്കും. കായികമേളകളിൽ സുരക്ഷ വർദ്ധിപ്പിക്കാൻ ആവശ്യമായ നടപടികൾ കൈക്കൊള്ളുമെന്നും മന്ത്രി അറിയിച്ചു.