കഴക്കൂട്ടം: പള്ളിപ്പുറം തോന്നൽ ദേവിക്ഷേത്രത്തിലെ നവരാത്രി സംഗീതോത്സവത്തിന്റെ ആറാം ദിവസമായ ഇന്നലെ മുഖ്യ ആകർഷണമായി അഖിൽ ഷാ അൻസാറിന്റെ സംഗീത കച്ചേരി. തുമ്പ സെന്റ് സേവ്യേഴ്സ് കോളേജിലെ അവസാനവർഷ മാദ്ധ്യമവിദ്യാർത്ഥിയാണ് ചേരമാൻ തുരുത്ത് വടക്കേ തൈവിളാകത്ത് വീട്ടിൽ അഖിൽ ഷാ.കഴിഞ്ഞ 15 വർഷമായി സംഗീതം ശാസ്ത്രീയമായി അഭ്യസിക്കുന്ന അഖിൽ സ്കൂൾ, കോളേജ് കലോത്സവങ്ങളിലെ ശാസ്ത്രീയ സംഗീത മത്സരങ്ങളിൽ നിരവധി സമ്മാനങ്ങൾ നേടിയിട്ടുള്ള പ്രതിഭയാണ്. ക്ഷേത്രോത്സവങ്ങളുമായി ബന്ധപ്പെട്ട് മാത്രം സാദ്ധ്യതകളുള്ള കലാരംഗങ്ങളിൽ നിന്ന് യുവാക്കൾ പിന്നാക്കം പോയ്ക്കോണ്ടിരിക്കുന്ന കാലത്ത് സംഗീതക്കച്ചേരി നടത്താൻ താത്പര്യപൂർവം മുന്നിട്ടിറങ്ങിയ അഖിലിനെ നവരാത്രി സംഗീതോത്സവ സംഘാടകരും കാലകാരന്മാരും അഭിനന്ദിച്ചു. പ്രശസ്ത സംഗീതജ്ഞൻ വർക്കല സി.എസ്. ജയറാമിന്റെ മകനും വിവിധ സംഗീത പരിപാടികളിൽ പങ്കെടുക്കുകയും ചെയ്യുന്ന ആനന്ദ് ജയറാമാണ് വയലിൻ വായിച്ചത്. ആകാശവാണിയിലെ ബി. ഹൈ ആർട്ടിസ്റ്റായ തിരുവനന്തപുരം സുന്ദരേശ്വരനായിരുന്നു മൃദംഗം.പത്രപ്രവർത്തകനായ എം.എം.അസാറിന്റെയും പെരുമാതുറ അൽ ഹജർ പബ്ലിക് സ്കൂൾ അധ്യാപിക സജീന ( ബിന്ദു )യുടെയും മകനാണ് അഖിൽ ഷാ ആദിൽ അൻസാർ, അഫ്ലഖ് അൻസാർ എന്നിവർ സഹോദരങ്ങളാണ്.