കഴക്കൂട്ടം: നിരവധി കമ്പനികൾ പ്രവർത്തിക്കുന്ന വ്യവസായ മേഖലയായ മേനംകുളം തുമ്പ കിൻഫ്ര അപ്പാരൽ പാർക്കിലെ ഇൻഡ്രോയൽ ഫർണിച്ചറിന്റെ മെത്ത നിർമ്മാണ യൂണി​റ്റിൽ തീപിടിത്തം. ഇന്നലെ രാത്രി 9.30യോടെയാണ് തീപിടിത്തം ഉണ്ടായത്. വലിയ തോതിൽ പുകയും തീയും ഉയരുന്നത് കണ്ട കമ്പനിയിലെ സെക്യൂരിറ്റി ജീവനക്കാർ ഉടൻ തന്നെ കഴക്കൂട്ടം പൊലീസിലും ഫയർഫോഴ്സിലും വിവരം അറിയിച്ചു. തുടർന്ന് കഴക്കൂട്ടം,​ ചാക്ക,​ ചെങ്കൽചൂള എന്നിവിടങ്ങളിൽ നിന്നുള്ള അഗ്നിശമന സേനാ യൂണി​റ്റുകളെത്തിയാണ് തീ നിയന്ത്റണവിധേയമാക്കിയത്. രണ്ട് മണിക്കൂറിന് ശേഷമാണ് തീ പൂർണമായി അണയ്ക്കാൻ കഴിഞ്ഞത്. പ്രദേശത്തെ മ​റ്റ് സ്ഥലങ്ങളിലേക്ക് തീ പടർന്ന് പിടിക്കാത്തതിനാലും കമ്പനിയിൽ ജീവനക്കാർ ഇല്ലാത്തതിനാലും വൻ ദുരന്തം ഒഴിവായി. നാശനഷ്ടത്തിന്റെ കണക്ക് വ്യക്തമായിട്ടില്ല. ഷോർട്ട് സർക്യൂട്ടാണ് തീപിടിക്കാനുള്ള കാരണമെന്നാണ് പ്രാഥമിക നിഗമനം. കിൻഫ്രയിൽ മുമ്പ് ആശാപുര ക്ളേ ഫാക്ടറിയിലും തീപിടിത്തം ഉണ്ടായിട്ടുണ്ട്.