തിരുവനന്തപുരം: ഈ വർഷം മുതൽ സ്‌കൂൾ ശാസ്‌ത്രോത്സവ നടത്തിപ്പിന് സബ് ജില്ലാതലം മുതൽ പൂർണമായും ഓൺലൈൻ സംവിധാനം കേരള ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷൻ (കൈറ്റ്) ഏർപ്പെടുത്തി. ശാസ്‌ത്രോത്സവത്തിന്റെ ഭാഗമായുള്ള അഞ്ച് മേളകളുടെയും (ശാസ്ത്ര, ഗണിതശാസ്ത്ര, സാമൂഹ്യശാസ്ത്ര, പ്രവൃത്തി പരിചയ, ഐടി മേളകൾ) പ്രീഫെയർ, ഫെയർ, പോസ്റ്റ് ഫെയർ എന്നിങ്ങനെയുള്ള പ്രധാന മൊഡ്യൂളുകൾ സംയോജിപ്പിച്ചാണ് 'സ്‌കൂൾ ശാസ്‌ത്രോത്സവം' ( (www.schoolsasthrolsavam.in) പോർട്ടൽ തയാറാക്കിയിരിക്കുന്നത്.

കൈറ്റ് തയാറാക്കിയ സ്‌കൂൾ മാനേജ്‌മെന്റ് സോഫ്ട്‌വെയർ ആയ 'സമ്പൂർണ'യിൽ നിന്നുള്ള കുട്ടികളുടെ വിവരങ്ങൾ ഈ വർഷം മുതൽ പോർട്ടലിൽ നേരിട്ട് ലഭ്യമാകും. കുട്ടിയുടെ അഡ്മിഷൻ നമ്പർ മാത്രം നൽകിയാൽ മറ്റു വിവരങ്ങൾ പ്രദർശിപ്പിക്കപ്പെടും. രജിസ്‌ട്രേഷൻ സമയത്ത് തന്നെ ഓരോ വിദ്യാർത്ഥിക്കും പ്രത്യേക നമ്പർ ലഭിക്കും. സ്റ്റേജുകളുടെ നിർണയം, മത്സരാർത്ഥികളുടെ വിവരങ്ങൾ, സ്ഥാനങ്ങൾ, സർട്ടിഫിക്കറ്റുകളുടെ പ്രിന്റിംഗ് എന്നിവയും ഓട്ടോമേറ്റ് ചെയ്തിട്ടുണ്ട്.

സബ്ജില്ലാതലം തൊട്ട് സ്‌കൂളുകളുടെ സ്ഥാനവും വിജയികളുടെ വിവരങ്ങളും ഉൾക്കൊള്ളുന്ന പൂർണമായ ഫലം പൊതുജനങ്ങൾക്കും അറിയാൻ കഴിയുന്നവിധം പോർട്ടലിൽ സംവിധാനം ഏർപ്പെടുത്തിയിട്ടുണ്ടെന്ന് കൈറ്റ് എക്സിക്യൂട്ടീവ് ഡയറക്ടർ കെ. അൻവർ സാദത്ത് അറിയിച്ചു.

ഈ വർഷം 11677 സ്‌കൂളുകളിൽ നിന്നുള്ള 367842 കുട്ടികളാണ് 163 സബ് ജില്ലകളിലെ ശാസ്‌ത്രോത്സവത്തിൽ പങ്കെടുക്കുന്നത്. പ്രൈമറി, ഹൈസ്‌കൂൾ, ഹയർസെക്കൻഡറി തലങ്ങളിൽ 283 ഇനങ്ങളിലെ മത്സരങ്ങളാണ് കൈറ്റ് ഓൺലൈനാക്കിയിട്ടുള്ളത്.