പോത്തൻകോട് : പോത്തൻകോട് ബ്ലോക്ക് പഞ്ചായത്തിന് ഐ.എസ്.ഒ അംഗീകാരം. ഇതോടെ ജില്ലയിൽ ഐ.എസ്.ഒ അംഗീകാരം നേടുന്ന മൂന്നാമത്തെ ബ്ലോക്ക് പഞ്ചായത്തായി മാറുകയാണ് പോത്തൻകോട്. ഈ സാമ്പത്തിക വർഷം ജില്ലയിൽ പദ്ധതി ആസൂത്രണത്തിൽ നൂറു ശതമാനം ലക്‌ഷ്യം കൈവരിച്ച ബ്ലോക്ക് പഞ്ചായത്തായി മാറിയതിനെത്തുടർന്നാണ് അംഗീകാരം. പദ്ധതി നിർവഹണത്തിൽ കഴിഞ്ഞ കുറെ വർഷങ്ങളായി സംസ്ഥാനത്ത് ഏറ്റവും പിന്നാക്കം നിന്ന ബ്ലോക്ക് പഞ്ചായത്തായിരുന്നു പോത്തൻകോട്. ഭരണരംഗത്തും ജീവനക്കാരുടെ കൃത്യനിർവഹണത്തിലും കൈവരിച്ച മികവിനും കൂടിയാണ് അന്താരാഷ്ട്ര ഗുണമേന്മ അംഗീകാരമായ ഐ.എസ്.ഒ നേടാൻ കഴിഞ്ഞത്. നിലവിലെ ബ്ലോക്ക് പഞ്ചായത്ത്‌ പ്രസിഡന്റ് അഡ്വ. ഷാനിബ ബീഗത്തിന്റെ നേതൃത്വത്തിൽ കൂട്ടായ പ്രവർത്തനം കൊണ്ടാണ് ബ്ലോക്ക് പഞ്ചായത്തിനെ ഈ നിലയിൽ എത്തിക്കാനായത്. മികച്ച സൗകര്യങ്ങൾ ലഭ്യമാകുന്ന ഫ്രണ്ട്‌ ഓഫീസ്, ഭിന്നശേഷിക്കാർക്കുള്ള സൗകര്യങ്ങൾ, വിശ്രമമുറി, മുലയൂട്ടൽ മുറി തുടങ്ങിയ സൗകര്യങ്ങൾ ഇവിടെ ഒരുക്കിയിട്ടുണ്ട്. ഐ.എസ്.ഒ അംഗീകാര പ്രഖ്യാപനം മന്ത്രി എ.സി.മൊയ്തീൻ നടത്തുമെന്ന് ബ്ലോക്ക് പഞ്ചായത്ത് പ്രസിഡന്റ് അഡ്വ.ഷാനിബ ബീഗം പറഞ്ഞു.