ചിറയിൻകീഴ്: സംസ്ഥാനത്തെ ആദ്യ മിൽക് എ.ടി.എം ആറ്റിങ്ങൽ വീരളം ക്ഷേത്രത്തിന് സമീപം പ്രവർത്തനമാരംഭിച്ചു. മന്ത്രി കെ.രാജു എ.ടി.എമ്മിൽ നിന്നെടുത്ത പാൽ ബി.സത്യൻ എം.എൽ.എയ്ക്ക് കൈമാറി ഉദ്ഘാടനം നിർവഹിച്ചു. കീഴാറ്റിങ്ങൽ മിൽകോയുടെ നേതൃത്വത്തിൽ സ്ഥാപിച്ച 500 ലിറ്റർ സംഭരണ ശേഷിയുള്ള എ.ടി.എമ്മിലൂടെ 24 മണിക്കൂറും പാൽ ലഭിക്കും. പാൽ കൊണ്ട് പോകുന്നതിനുള്ള പാത്രമോ കുപ്പിയോ കൊണ്ട് പോകണം. പണം ഉപയോഗിച്ചോ മിൽകോ നൽകുന്ന കാർഡുപയോഗിച്ചോ ഉപഭോക്താക്കൾക്ക് പാലെടുക്കാം. മിൽക് കാർഡിൽ ഒറ്റത്തവണ 1500 രൂപയോ അതിൽ കൂടുതലോ ചാർജ് ചെയ്താൽ മിൽകോയുടെ ഒരു ലിറ്റർ ഐസ്‌ക്രീം സൗജന്യമായി ലഭിക്കും. എ.ടി.എമ്മിനോട് ചേർന്ന ഔട്ട് ലെറ്റിൽ നിന്നും മിൽകോയുടെ ഉത്പന്നങ്ങളും ലഭിക്കും. അന്യസംസ്ഥാനങ്ങളിൽ നിന്നും വരുന്ന മാരക രാസപദാർത്ഥങ്ങൾ കലർത്തിയ പാലൊഴിവാക്കി ഇവിടത്തെ കർഷകർ‌ ജൈവരീതിയിൽ ഉത്പാദിച്ച ശുദ്ധമായ പാൽ ഉപഭോക്താക്കൾക്ക് നേരിട്ട് ലഭ്യമാക്കുക എന്ന ഉദ്ദേശ്യത്തോടെയാണ് പദ്ധതിക്ക് തുടക്കം കുറിച്ചത്. മിൽകോയുടെ ഡെയറി ഫാമിൽ നിന്നുളള പാലാകും എ.ടി.എമ്മിലൂടെ വിതരണം ചെയ്യുന്നത്. ഇതിന്റെ വിജയം അനുസരിച്ച് മറ്റിടങ്ങളിലും മിൽക് എ.ടി.എം ആരംഭിക്കുന്നതിനെക്കുറിച്ച് ആലോചിക്കുമെന്ന് മിൽകോ പ്രസിഡന്റ് പഞ്ചമം സുരേഷും സെക്രട്ടറി അനിൽകുമാറും സംയുക്തമായി കേരളകൗമുദിയോട് പറഞ്ഞു.