കഴക്കൂട്ടം: മേയർ അഡ്വ.വി.കെ പ്രശാന്ത് വട്ടിയൂർക്കാവിൽ നിന്ന് ജയിച്ചു എം.എൽ.എ ആയതോടെ ഒഴിവ് വരുന്ന കോർപ്പറേഷൻ കഴക്കൂട്ടം വാർഡിലേക്കുള്ള സ്ഥാനാർത്ഥിയെ കണ്ടെത്താനുള്ള ചർച്ചകൾ സി.പി.എമ്മിൽ തുടങ്ങിക്കഴിഞ്ഞു. ഡി.വൈ.എഫ്.ഐ കഴക്കൂട്ടം ഏരിയാ സെക്രട്ടറിയും ജില്ലാ കമ്മിറ്റി അംഗവും പാർട്ടി ഏരിയാ കമ്മിറ്റി അംഗവുമായ എസ്.പ്രശാന്തിനെ മത്സരിപ്പിക്കണമെന്നാണ് ആവശ്യം ഉയരുന്നത്. വി.കെ.പ്രശാന്തിന്റെ സമകാലിക സംഘടനാ പ്രവർത്തകനാണ് എസ്.പ്രശാന്തും.
യുവാക്കൾക്കിടയിൽ സർവ സമ്മതനായ എസ്.പ്രശാന്തിനെ മത്സരിപ്പിക്കണമെന്ന ആവശ്യം ഉപതിരഞ്ഞെടുപ്പ് ഫലപ്രഖ്യാപനം വന്ന വ്യാഴാഴ്ച മുതൽ ഉയരുകയാണ്. വട്ടിയൂർക്കാവ് മണ്ഡലത്തിലെ ഉപതിരഞ്ഞെടുപ്പിൽ മത്സരിക്കാനായി മേയർ വി.കെ.പ്രശാന്തിന്റെ പേര് വന്നപ്പോൾ തന്നെ വിജയം ഉറപ്പിച്ച പാർട്ടി പ്രവർത്തകർ കോർപ്പറേഷന്റെ ഒന്നാം വാർഡിൽ എസ്.പ്രശാന്തിന്റെ പേര് പറഞ്ഞു തുടങ്ങിയിരുന്നു. തിരഞ്ഞെടുപ്പ് ഫലം വന്നതോടെ അത് ശക്തമായി. പ്രശാന്തിന് പകരം പ്രശാന്ത് വരട്ടെ എന്നാണ് പ്രവർത്തകർ പറയുന്നത്.
മേയർ ഇന്ന് രാജി വയ്ക്കും