തിരുവനന്തപുരം: ഈ സർക്കാർ അധികാരത്തിലെത്തി മൂന്നരവർഷംകൊണ്ട് ജല അതോറിട്ടി വഴി നൽകിയത് 6,06,880 കണക്‌ഷനുകൾ. അതിനുമുമ്പുള്ള അഞ്ചുവർഷക്കാലംകൊണ്ടു നൽകിയത് 6,15,726 കണക്‌ഷനുകളായിരുന്നു. 10 ലക്ഷം കുടുംബങ്ങൾക്കെങ്കിലും കുടിവെള്ള കണക്‌ഷൻ നൽകാനുള്ള നടപടികളുമായി മുന്നോട്ടുപോകുകയാണെന്ന് ജല അതോറിട്ടി വാർത്താക്കുറിപ്പിൽ അറിയിച്ചു.
ജൽജീവൻ മിഷനുമായി സഹകരിച്ച്, അഞ്ച് വർഷംകൊണ്ട് 55 ലക്ഷം ഗ്രാമീണ വീടുകളിൽ പൈപ്പിൽകൂടി ശുദ്ധജലമെത്തിക്കാനും ലക്ഷ്യമിടുന്നുണ്ട്. ചെലവിന്റെ പകുതി കേന്ദ്രസർക്കാരും ബാക്കി സംസ്ഥാനവും വഹിക്കും. ഇതിന്റെ കർമപദ്ധതി തയ്യാറാക്കൽ ആരംഭിച്ചിട്ടുണ്ട്.

കഴിഞ്ഞ മൂന്നര വർഷത്തിനിടെ 5,65,722 ഗാർഹിക കണക്‌ഷനുകൾ നൽകി. ഗാർഹികേതര മേഖലയിൽ 30,209 കണക്‌ഷനുകളും വ്യവസായ മേഖലയിൽ 318 കണക്‌ഷനുകളും മറ്റ് പദ്ധതികളിലായി 10,631 കണക്‌ഷനുകളും നൽകി. നിലവിൽ 25,39,959 പേർക്കാണ് കുടിവെള്ള കണക്‌ഷനുകൾ നൽകിയിട്ടുള്ളത്.
സംസ്ഥാനത്ത് ആലപ്പുഴ ഡിവിഷനു കീഴിലാണ് ഏറ്റവും കൂടുതൽ കണക്‌ഷൻ നൽകിയിട്ടുള്ളത്. 60,051 ഗാർഹിക കണക്‌ഷൻ അടക്കം 61,912 കുടിവെള്ള കണക്‌ഷൻ ഈ ഡിവിഷനു കീഴിൽ നൽകിയിട്ടുണ്ട്. കൊല്ലം പി.എച്ചിന് കീഴിൽ 43,292, കോഴിക്കോട് 35,677, പാലക്കാട് 30,685, കൊച്ചി ഡബ്ളിയു.എസിന് കീഴിൽ 29,045 , ആറ്റിങ്ങലിൽ 27,167, ഇരിങ്ങാലക്കുട 26,066, മലപ്പുറത്ത് 25,396, കൊച്ചി പിഎച്ച് ഡിവിഷനിൽ 25,067 എന്നിങ്ങനെ കുടിവെള്ള കണക്‌ഷൻ നൽകിയിട്ടുണ്ട്.
മറ്റ് ഡിവിഷനുകളിൽനിന്നു നൽകുന്ന കണക്‌ഷനുകളുടെ വിവരം ചുവടെ:
ആലുവ: 17742, അരുവിക്കര: 19353, എടപ്പാൾ: 12815, കടുത്തുരുത്തി: 20634, കണ്ണൂർ: 17104, കാസർകോട്: 4525, കൊട്ടാരക്കര: 14751, കോട്ടയം: 16065, മൂവാറ്റുപുഴ: 15272, നെയ്യാറ്റിൻകര: 17667, പത്തനംതിട്ട: 13938, ഷൊർണൂർ: 24835, സുൽത്താൻ ബത്തേരി: 8128, തളിപ്പറമ്പ്: 16419, തിരുവല്ല: 16054, തൊടുപുഴ: 9412, തൃശൂർ: 10393, തിരുവനന്തപുരം (നോർത്ത്): 18410, തിരുവനന്തപുരം (സൗത്ത്): 22017, വടകര: 7039.