തിരുവനന്തപുരം: ഏഴു ദിവസത്തെ ചലച്ചിത്ര ശില്പശാലയ്ക്കും ദേശീയ സെമിനാറിനും നാളെ വഴുതക്കാട് വിമെൻസ് കോളജിൽ തുടക്കമാകും. കോളേജ് അസംബ്ളി ഹാളിൽ രാവിലെ 11ന് സംവിധായകൻ അടൂർ ഗോപാലകൃഷ്ണൻ ഉദ്ഘാടനം ചെയ്യും. പ്രിൻസിപ്പൽ ഡോ. ജി. വിജയലക്ഷ്മി അദ്ധ്യക്ഷയാകും.
ചലച്ചിത്ര അക്കാഡമി സെക്രട്ടറി മഹേഷ് പഞ്ചു, സി ഡിറ്റ് രജിസ്ട്രാർ ജയദേവ് ആനന്ദ് എന്നിവർ സംബന്ധിക്കും. ചലച്ചിത്രകലയുടെ വികാസപരിണാമങ്ങൾ, ദേശീയതയും ഇന്ത്യൻ സിനിമയിലെ സ്ത്രീപരിചരണവും തിരക്കഥാപഠനം, ശബ്ദകല, രാഷ്ട്രീയവും സിനിമയും തുടങ്ങിയ വിഷയങ്ങളിൽ സംവിധായിക വിധു വിൻസന്റ്, എൽ. അശോകൻ, ബൈജുചന്ദ്രൻ, കെ.ജി. ജയൻ, എ. ചന്ദ്രശേഖർ, പ്രൊഫ. വി. അലിയാർ, പ്രദീപ് പനങ്ങാട്, രാജേഷ് കെ.എരുമേലി തുടങ്ങിയവർ ക്ലാസുകൾ നയിക്കും. പരിപാടിയുടെ ഭാഗമായി വിമെൻസ് കോളേജ് വിദ്യാർത്ഥികളുടെ ചലച്ചിത്ര നിർമ്മാണവും നടക്കും. ചലച്ചിത്ര അക്കാഡമി, സി ഡിറ്റ്, കോളേജ് വിദ്യാഭ്യാസ വകുപ്പ് എന്നിവയുടെ സഹകരണത്തോടെയാണു പരിപാടി സംഘടിപ്പിച്ചിരിക്കുന്നത്‌.