കല്ലമ്പലം: കരവാരം പഞ്ചായത്ത് ഭരണസമിതിക്കെതിരെ അഴിമതിയാരോപിച്ച് ബി.ജെ.പിയുടെ മാർച്ചും ധർണയും. വ്യാഴാഴ്ച രാവിലെ 10 ന് കരവാരം പഞ്ചായത്ത് കൃഷിഭവനിൽ നിന്നും തുടങ്ങി പഞ്ചായത്ത് ഓഫീസിൽ സമാപിക്കും. തെരുവുവിളക്കുകൾ കത്തിക്കുക, കിസാൻ സമ്മാൻ പദ്ധതിയിൽ ലിസ്റ്റ് തിരിമറി നടത്തിയത് പരിഹരിക്കുക, തെരുവുനായ്ക്കളുടെ ശല്യത്തിനെതിരെ ശാശ്വത പരിഹാരം കാണുക, പ്രധാന മന്ത്രിയുടെ സമ്പൂർണ ഭവന പദ്ധതി അട്ടിമറിച്ച് ലൈഫ് പദ്ധതിയാക്കി മാറ്റി അതില്ലാതാക്കിയതിന് പരിഹാരം കണ്ട് പുനഃസ്ഥാപിക്കുക, ഗതാഗത യോഗ്യമല്ലാത്ത ഗ്രാമീണ റോഡുകൾ നവീകരിക്കുക, ഫണ്ടുകൾ വകമാറ്റി ചെലവഴിക്കുന്നതവസാനിപ്പിക്കുക, പഞ്ചായത്തിന്റെ അനാവശ്യ ഇടപെടൽ തൊഴിൽ മേഖലയിൽ വരുത്തിയ മാന്ദ്യത്തിനു പരിഹാരം കാണുക, ലക്ഷങ്ങൾ മുടക്കി പഞ്ചായത്തിൽ സോളാർ ഫിറ്റ്‌ ചെയ്തതിലെ അഴിമതിയെക്കുറിച്ച് അന്വേഷിക്കുക തുടങ്ങിയ ആവശ്യങ്ങൾ ഉന്നയിച്ചാണ് മാർച്ചും കൂട്ട ധർണയും. ബി.ജെ.പി സംസ്ഥാന സെക്രട്ടറിയും, എസ്.എൻ.ഡി.പി അസി. സെക്രട്ടറിയുമായ ബഹുലേയൻ ഉദ്ഘാടനം ചെയ്യും. മേഖലാ ഉപാദ്ധ്യക്ഷൻ തോട്ടയ്ക്കാട് ശശി മുഖ്യ പ്രഭാഷണം നടത്തും. മണ്ഡലം പ്രസിഡന്റ് മണമ്പൂർ ദിലീപ്, കർഷക മോർച്ച മണ്ഡലം പ്രസിഡന്റ് കല്ലമ്പലം ഉല്ലാസ് കുമാർ, കുട്ടൻ കല്ലമ്പലം, ഷിനോദ്, വഞ്ചിയൂർ ഷിബുലാൽ, ജനകകുമാരി, രാജേഷ് തുടങ്ങിയവർ സംസാരിക്കും.