തിരുവനന്തപുരം: എയർമാർഷൽ ബി. സുരേഷ് പശ്ചിമ വ്യോമസേനാ മേധാവിയായി നാളെ ചുമതലയേൽക്കും. ആക്കുളം വ്യോമസേനാ ആസ്ഥാനത്ത് നടന്ന ചടങ്ങിൽ അദ്ദേഹത്തിന് ഗാർഡ് ഒഫ് ഓണർ നൽകി. തുടർന്ന് ദക്ഷിണ വ്യോമസേനയുടെ ചുമതല അദ്ദേഹം ഒഴിഞ്ഞു. തിരുവനന്തപുരം സ്വദേശിയായ സുരേഷ് കഴിഞ്ഞ വർഷം ആഗസ്റ്റ് ഒന്നിനാണ് ദക്ഷിണ വ്യോമസേനാ മേധാവിയായത്.
പ്രളയകാലത്ത് വ്യോമസേനയുടെ ദുരന്തനിവാരണ പ്രവർത്തനങ്ങൾ ഏകോപിപ്പിച്ചത് സുരേഷായിരുന്നു. 1980 ഡിസംബർ 13നാണ് സുരേഷ് വ്യോമസേനയിലെത്തിയത്. യുദ്ധ വിമാനങ്ങളും ഹെലികോപ്ടറുകളും പറത്തുന്നതിൽ വൈദഗ്‌ദ്ധ്യം നേടിയിട്ടുണ്ട്. ഫൈറ്റർ സ്ക്വാഡ്രൻ കമാൻഡിംഗ് ഓഫീസറായും സേവനമനുഷ്ഠിച്ചിട്ടുണ്ട്.
എയർ സ്റ്റാഫ് ഇൻസ്‌പെക്‌ഷൻ വിഭാഗത്തിൽ ജോയിന്റ് ഡയറക്ടർ, ഡയറക്ടർ, ടാറ്റിക്‌സ് ആൻഡ് എയർ കോംബാറ്റ് ഡെവലപ്‌മെന്റ് എസ്റ്റാബ്ലിഷ്‌മെന്റിൽ ഡയറക്ടിംഗ് സ്റ്റാഫ്, വ്യോമസേനാ മേധാവിയുടെ എയർ അഡ്വൈസർ, എയർ ഡിഫൻസിൽ അസിസ്റ്റന്റ് ചീഫ് ഒഫ് എയർ സ്റ്റാഫ് ഓപ്പറേഷൻസ്, പശ്ചിമവ്യോമസേനാ ആസ്ഥാനത്ത് സീനിയർ എയർ സ്റ്റാഫ് ഓഫീസർ, വ്യോമസേനാ ആസ്ഥാനത്ത് പേഴ്‌സണൽ വിഭാഗം മേധാവി എന്നീ നിലകളിൽ പ്രവർത്തിച്ചു. സ്‌തുത്യർഹസേവനത്തിന് രാഷ്ട്രപതിയുടെ പരംവിശിഷ്ട സേവാമെഡൽ, അതിവിശിഷ്ട സേവാമെഡൽ, വായുസേനാ മെഡൽ എന്നിവ അദ്ദേഹത്തിന് ലഭിച്ചിട്ടുണ്ട്. രാഷ്ട്രപതിയുടെ എ.ഡി.സി ആയി പ്രവർത്തിക്കുകയാണ്.